Djıý-djıtsýdan álem chempıony týǵan aýylynda shákirt tárbıelep júr

AQTAÝ. QazAqparat - Mańǵystaý oblysy Túpqaraǵan aýdany Taýshyq aýylynyń sportshylary halyqaralyq jarystarda top jaryp júr. Ýkraınanyń Kıev qalasynda djıý-djıtsýdan ótken álem chempıonatynda Azamat Abaev osyǵan deıin altyn medal jeńip alǵan bolatyn. Búginde ol týǵan aýylynda shákirt tárbıeleýde, dep habarlaıdy QazAqparat tilshisi.

Azamat Abaev 94 keli salmaq dárejesinde synǵa túsedi. Djıý-djıtsýmen 2015 jyldan beri aınalysady. Ol osyǵan deıin kıkboksıngpen de shuǵyldanǵan. Jattyqtyrýshysy - Bolat Dúısenbıev.

Ol bıylǵy jyl oljaly bolǵanyn aıtady. Qazaqstan chempıony atanǵan. Kıev qalasynda 20-dan astam memleket qatysqan saıysta ol Qazaqstan namysyn qorǵap, 4 memlekettiń sporshysymen beldesip, Mańǵystaýdyń mártebesin asqaqtatty. Álem chempıony atandy. Qazir basqa jarysqa daıyndyq ústinde.

«Aldaǵy jospar - Saýd Arabııasynda ótetin Azııa chempıonatyna qatysý. Soǵan daıyndyqty bastadyq. Buıyrsa chempıon bolýǵa tyrysamyz. Mańǵystaýdan 10 shaqty bala barady. Bári - Ulttyq qurama múshesi. Qazaqstan atynan óner kórsetedi»,-deıdi Azamat Abaev.

Búginde Azamat shákirt tárbıelep, jas sportshylardy baýlýda. Úıirmede 40-qa jýyq bala jattyǵady. 6 jastan bastap eresekterge deıingi top jasaqtalǵan.

Azamattyń aıtýynsha, djıý-djıtsý eptilikti, jyldamdyqty, qarsylasty aıla-tásilmen jeńýdi talap etedi. Barlyq sport túrinen habardar bolýyń kerek. Aptasyna 3 ret jattyǵatyn sportshylar muny jaqsy biledi.

«Іshinde dzıýdo, karate-de, kıkboksıngte qoldanylatyn ádister bar. Bul sporttyń 3 túri bar. Kombat, nevaza, faıtıng dep atalady. Faıtıngte aıaqpen, qolmen jumys isteý kerek. Nevazada parter jaqsy. Kombatta barlyq túrleri qamtylǵan. 2 jyl ishinde kóp jetistikke jettim. Qazaqstan sport sheberine úmitker degen razrıad aldym. Jattyqtyrýshy Azamat Abaevqa alǵysym sheksiz. Ol osy sportqa degen qulshynysymyzdy oıatyp, mekteptegi oqýshylardy shaqyrady. Biz aǵaıymyzdyń jetistigin kórgennen keıin ol sııaqty bolýǵa umtylamyz. Álem elderine shyǵyp, jarystarǵa qatysýǵa bolatynyna senemiz»,-deıdi Shahta orta mektebiniń 10-synyp oqýshysy Qumar Seıilhan.

Endi taýshyqtyq 6 oqýshy Almaty qalasynda djıý-djıtsý boıynsha ótetin halyqaralyq týrnırge daıyndyq ústinde. Sporshylar 48, 55, 62, 63 keli salmaq dárejesinde oblys namysyn qorǵaıdy.

Aıta keteıik, jalpy Taýshyq sport mektebinde fýtbol, basketbol, qazaq kúresi, dzıýdo, kıkboksıng, voleıbol úıirmeleri bar. Barlyǵy 200-den astam aýyl jasy sportpen aınalysyp, salaýatty ómir saltyn ustanady.