Djıý-djıtsýdan álem chempıonaty: fınalda qos qazaq qyzy kúresip, Jibek Qulymbetova úzdik shyqty
ASTANA. KAZINFORM — Taılandtyń Bangkok qalasynda djıý-djıtsýdan eresekter arasynda ótip jatqan álem chempıonatynda qazaqstandyq Jibek Qulymbetova altyn medaldi jeńip aldy.
J.Qulymbetova 48 kelige deıingi salmaqta otandasy Raıhan Abdýllaevamen beldesti. Olardyń ekeýi de Almaty oblysynan edi. Osylaısha, elýden astam memleket ókilderi qatysyp jatqan jarystyń alǵashqy kúni Qazaqstan qorjynyna qos júlde tústi.
Maqsat Muratuly jattyqtyratyn Jibek Qulymbetova tuńǵysh ret eresekter arasynda top jardy. Buǵan deıin ol jasóspirimder arasynda 11 dúrkin álem chempıony atanǵan edi.
- Bangkok qalasynda 18 jasymda alǵash ret eresekter arasynda álem chempıonatyna qatysyp, tórt kezdesý ótkizip, jeńimpaz atandym. Bul jeńis – tek bir kúnniń eńbegi emes. Bul – 9 jyldyq tabandylyqtyń, tártiptiń, senimniń jemisi. Keshe ǵana jasóspirimder arasyndaǵy jarysqa qatysyp júrýshi edim, búgin fınalda óz elimniń sportshysymen kezdesip, jeńis tuǵyrynan kórinip, kók týymdy kóterdim, - dedi J.Qulymbetova.
Eske sala keteıik, budan buryn qazaqstandyqtyń djıý-djıtsý men grepplıngten 11 dúrkin álem chempıony bolǵanyn jazǵan edik.