Djıý-djıtsý sheberi Aldııar Serik Islam oıyndarynyń jeńimpazy atandy

ASTANA. KAZINFORM — Qazaqstandyq djıý-djıtsý sheberi Aldııar Serik Er-Rııadtaǵy (Saýd Arabııasy) Islam yntymaqtastyǵy oıyndarynda altyn medal jeńip aldy.

Serik 69 kelige deıingi salmaqtyń aqtyq synynda jeńiske jetti. QR UOK málimetinshe, fınalda qazaqstandyq sportshy Mohammed Hýraımılany (Saýd Arabııasy) jeńdi.

Osylaısha, Qazaqstan quramasynyń enshisinde 13 altyn medal bar. Otandasymyz jarystan keıingi suqbatynda fınaldyq kezdesýdiń qıyn bolǵanyn aıtty.

– Búgin Saýd Arabııasynda jeńiske jetip, kók týymyzdy bıikke kótergenime qýanyshtymyn. Birinshiden ózimniń ákeme jáne bapkerime alǵys aıtamyn. Sondaı-aq qoldaý kórsetken qaýymdastyq prezıdentine jáne komandama kóp raqmet. Árıne, fınaldyq kezdesý óte qıyn boldy. Aıta keterligi, qarsylasym Saýd Arabııa ókili bir apta buryn álem chempıony atanǵan edi. Sondyqtan kishkene qysym sezildi. Biraq soǵan qaramastan jeńiske jettim, - dedi Aldııar Serik.

Aıta keteıik, Sofııa Aqtaeva Islam yntymaqtastyǵy oıyndarynda kúmis medal jeńip aldy.

Gandboldan Qazaqstan áıelder quramasy Er-Rııadtaǵy (Saýd Arabııasy) Islam yntymaqtastyǵy oıyndarynyń fınalyna shyqty.