Djıý-djıtsý boıynsha tóreshiler men jattyqtyrýshylarǵa arnalǵan respýblıkalyq semınar ótti
ASTANA. QazAqparat - Elimizge semınar ótkizý maqsatynda djıý-djıtsý boıynsha joǵarǵy halyqaralyq sanattaǵy sport tóreshisi Andreı Petrachkov kelip ketti.
Qazaqstan Respýblıkasy Djıý-djıtsý qaýymdastyǵy óz sportshylarynyń sheberlik deńgeıin arttyrý maqsatynda árdaıym oqytý men sheberlik klastaryn ótkizip turady. Aǵymdaǵy jyldyń 23-24 shilde aralyǵynda Aqmola oblysy Şýchınsk qalasynda ornalasqan Jaqsy sport kesheninde tóreshiler men jattyqtyrýshylarǵa arnalǵan djıý-djıtsý boıynsha respýblıalyq semınar ótti. Semınarǵa 10 oblys, Astana men Almaty qalalarynyń ókilderi qatysty.
Oqytýdyń basty maqsaty qatysýshylardyń biliktiligin arttyryp, bilimin tereńdetý bolyp tabylady.
Semınar oqytýshysy retinde belgili reseılik sportshy Andreı Fedorovıch Petrachkov qatysty. Andreı Petrachkov djıý-djıtsý boıynsha Máskeý Federatsııa Basqarmasynyń múshesi, MFB Tóreshiler alqasynyń tóraǵasy, djıý-djıtsý boıynsha Reseı Federatsııasy Tóreshiler komıssııasynyń tóraǵasy, Renshı qurmetti ataǵy bar, 5-shi dan sheberi jáne djıý-djıtsý boıynsha halyqaralyq nusqaýshy, djıý djıtsý boıynsha joǵarǵy sanatattaǵy halyqaralyq sport tóreshisi (World A lıtsenzııasy), Seikai Judokai Halyqaralyq jaýyngerlik óneri Qaýymdastyǵy Joǵarǵy Keńesiniń múshesi bolyp tabylady.
Semınar aıasynda birneshe is-shara, onyń ishinde oqytý semınary jáne «faıtıng-sıstem», «ne-vaza-sıstem», «dýo-sıstem», «samooborona-sıstem», «brazıl-sıstem» men «ADS kombat-sıstem» taraýlarynda tehnıkalar úıretilip tájirıbelik sabaqtar ótkizildi. Attestatsııa emtıhan týrinde, ıaǵnı qatysýshylar arnaıy daıyndalǵan bıletterdegi suraqtarǵa tolyqandy jaýap berýleri tıis boldy.
Attestatsııalyq komıssııa músheleri retinde QR Djıý djıtsý qaýymdastyǵynyń qurmetti prezıdenti Nurjan Elkeev, birinshi vıtse-prezıdenti Ilıa Mırzo, QR qurama komandasynyń negizgi quramynyń aǵa jattyqtyrýshysy Qalı Áshim, joǵary sanattaǵy ulttyq tóreshi, QR eńbek sińirgen jattyqtyrýshycy Saıat Erjanov, halyqaralyq sanattaǵy tóreshi, dáris ótkizgen ataqty reseılik sportshy Andreı Petrachkov jáne komıssııa hatshysy Konstantın Pomazaı sportshylardyń bilimi men biliktiligin baǵalady.
Baqtaryn synaǵan 42 úmitker arasynan emtıhannan súrinbeı, júzden júırik bolyp úzdik baǵa alǵan 7 jattyqtyrýshy men 12 tóreshige kýálik tabystalyp, halyqaralyq tóreshilik-jattyqtyrýshylyq kýrstaryna joldama aldy.
