Djıý-djıtsý boıynsha Álem chempıonatynda Qazaqstan quramasy 9 altyn, 10 kúmis jáne 10 qola medal jeńip aldy

Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte «Qazaqstan djıý-djıtsý jáne grepplıng» federatsııasy vıtse-prezıdenti, brazılııalyq djıý-djıtsý sport túri boıynsha Qazaqstan quramasynyń bas jattyqtyrýshysy Armanjan Rýzahýnov aıtty.

«Sáýir aıynda Ábý-Dabıde ótken djıý-djıtsý boıynsha Álem chempıonatynda Qazaqstan quramasy 9 altyn, 10 kúmis jáne 10 qola medal jeńip aldy. Bul jetistik Qazaqstan quramasyn eń myqty úsh komandanyń qataryna qosty. Ózderińiz bilesizder, Qazaqstanda djıý-djıtsýdyń damyp kele jatqanyna kóp bolǵan joq. Sondyqtan Ábý-Dabıde ótken chempıonat mańyzdy oqıǵa boldy. Jalpy bul sport túri boıynsha federatsııa eki jyldan beri jumys istep keledi. Osy az ýaqyt ishinde kóp is atqardyq jáne solardyń nátıjelerin kórip otyrmyz», - deıdi A. Rýzahýnov. Onyń aıtýynsha, Álem chempıonatyna elimizdiń atynan 78 sportshy qatysty. Sonyń ishinde Astana qalasynyń komandasy 4 altyn, 4 kúmis jáne 1 qola júlde jeńip aldy. «Biz byltyr da eń myqty úsh komandanyń qatarynda bolǵanbyz. Biraq, ótken jylǵy jarysta jalpy qatysqan sportshylar sany az bolǵan edi. Byltyr myńnan astam sportshy qatyssa, bıyl júlde úshin talasqandar sany tórt myń adamǵa jýyqtady. Osyǵan qarap, djıý-djıtsý sporty qanshalyqty damyp kele jatqanyn jáne ondaǵy básekeniń qanshalyqty myqty ekenin baıqaýǵa bolady», - deıdi A.Rýzahýnov.