Djıý-djıtsý: Álem kýbogynda 5 qazaqstandyq altyn medal jeńip aldy
NUR-SULTAN. QazAqparat - Qazaqstandyq 5 sportshy Taılanda djıý-djıtsýden stýdentter arasynda ótken Álem kýbogynda 5 altyn júldege qol jetkizdi, dep habarlaıdy QazAqparat QR djıý-djıtsý qaýymdastyǵyna silteme jasap.
Jarys 10-11 sáýirde eldiń soltústik astanasy Chang-Maı qalasynda JJIF halyqaralyq djıý-djıtsý federatsııasynyń jáne FISU Halyqaralyq ýnıversıtettik sport federatsııasynyń qamqorlyǵymen uıymdastyryldy.
«Aıta keteıik, 12 eldiń myqtylary qatysqan bedeldi jarysta 5 sportshy Qazaqstan namysyn qorǵady. Bul sportshylardyń barlyǵy júldeli bolyp, Álem kýbogynda altyn medaldi qanjyǵaǵa baılady. Onyń ishinde Darhan Nortaev, Qýandyq Qonysov, Galına Dývanova, Nursultan Dúısenqulov jáne Jánibek Ábý-Bákir bar. Bul kásipqoı sportshylardyń áleýeti zor. Olar óz sheberlikterin talaı márte kórsetken»,- deıdi Nur-Sultan qalasy mádenıet jáne sport basqarmasynyń basshysy, Qazaqstannyń djıý-djıtsý qaýymdastyǵynyń prezıdenti Bolat Majaǵulov.
Álem kýbogy úsh dıstsıplına boıynsha ótti: Fighting, Ne-Waza jáne Duo- sistem.
Azııa oıyndarynyń jeńimpazy Darhan Nortaev 62 kg deıingi salmaq dárejesinde nevaza-sıstem bóliminde 4 kezdesý ótkizdi. Sportshy barlyq qarsylastarynan basym tústi. Jartylaı fınalda Darhan Nortaev BAÁ sportshysynan aılasyn asyrsa, aqtyq syndy ýaqyttan buryn aıaqtady.
Sonymen qatar, dúbirli dodada nevaza-sıstem bóliminde 56 kg deıingi salmaq sanatynda kúsh synasqan Qýandyq Qonysov ta sátti óner kórsetti. Jerlesimiz Álem kýbogynda óz sheberliginiń arqasynda altyn júldege qol jetkizdi. Qýandyq qarsylastaryn sabmıshpen (aýyrtpa tásilmen) jeńdi.
Áıelder arasynda nevaza-sıstem bóliminde 57 kg deıingi salmaq sanatynda elordalyq Galına Dývanovaǵa tań keler eshkim bolmady, sportshy úzdik tehnıkasynyń arqasynda barlyq jekpe-jekterde taza jeńiske jetti.
Faıtıng-sıstem bóliminde 69 kg deıingi salmaq sanatynda Nursultan Dúısenqulov pen 62 kg deıingi salmaq dárejesinde Jánibek Ábý-Bákir Qazaqstan quramasynyń qorjynyna taǵy da júlde saldy.
JJIF Djıý-djıtsýden halyqaralyq federatsııa ókilderi Álem kýbogynda óner kórsetken qazaqstandyq sportshylardyń daıyndyǵy men sheberligine joǵary baǵasyn berdi.
JJIF Djıý-djıtsý halyqaralyq federatsııasynyń málimdeýinshe, stýdenttar arasyndaǵy Álem kýbogy - atalǵan sport túrin Dúnıejúzilik ýnıversıada baǵdarlamasyna engizýdegi alǵashqy qadam. Qazaqstan Respýblıkasynyń djıý-djıtsý qaýymdastyǵy djıý-djıtsýdy jáne onyń baǵyttaryn Qazaqstan Respýblıkasynyń ýnıversıtettik sport túrleri federatsııasyna engizý boıynsha kelissóz júrgizýde.
Aıta keteıik, 19-23 maýsymda elimizdiń bas qalasy Nur-Sultanda djıý-djıtsýden Grand Prix Nur-Sultan Open halyqaralyq reıtıngtik týrnıri ótedi. Jarysqa búkil álemnen 3 myńnan asa sportshy qatysady dep kútilýde. Bul - qazaqstandyq djıý-djıtsý tarıhyndaǵy eń iri shara bolmaq.
