Djıro d'Italııa kópkúndiginiń 15-shi kezeńinde «Astananyń» veloshabandozy jeńiske jetti
ASTANA. QazAqparat - Djıro d'Italııa kópkúndiginiń 15-shi kezeńinde «Astana Pro Team» komandasynyń ıtalııalyq veloshabandozy Fabıo Arý jeńiske jetti. Ol ataqty Plan-dı-Montekampone taýynda márege úsh shaqyrymǵa qalǵanda shabýylǵa shyǵyp, barlyq básekelesterin shań qaptyrdy, dep habarlaıdy kazsporttv.kz.
225 shaqyrymǵa sozylǵan 15-shi kezeń Valdengo men Plan-dı-Montekampone arasynda ótti. Aıta keteıik, bul kezeń ataqty ıtalııalyq veloshabandoz Marko Pantını qurmetine arnalǵan. Ol bul kezeńde 1998 jyly top jarǵan. Ekinshi jáne úshinshi oryndy kolýmbııalyq veloshabandozdar Fabıo Dýarte («Colombia») jáne Naıro Kıntana («Movistar Team») ıelendi. Al jalpy esepte top bastap kele jatqan taǵy bir kolýmbııalyq veloshabandoz Rıgoberto Ýran («Omega Pharma - Quick Step») máre syzyǵyn besinshi kesti. Bul nátıje onyń top tizginin saqtap qalýǵa múmkindik berdi. Fabıo Arým búgingi jeńisten keıin úsh satyǵa joǵarylap, jalpy esepte tórtinshi orynǵa turaqtady. Ol kósh basyndaǵy Rıgoberto Ýrannan 2 mınýt 24 sekýnd qalyp keledi.
