Djıppen qashqan esirtki ósirýshilerdi polıtsııa tikushaqpen qýyp ustady

Esirtki qylmysyna qarsy is-qımyl departamentiniń mobıldi toby jáne ІІM-niń arnaıy bólinisteri Qaraǵandy jáne Qyzylorda oblystarynyń shekaralaryn tikushaqpen barlaý kezinde Qyzylorda qalasynan 320 km qashyqtyqta qoldan ósirilgen qarasora plantatsııasyn anyqtaǵan. Sol jerde sýarýǵa arnalǵan basseın, agroquraldardy saqtaýǵa jáne sol jerde turýǵa arnalǵan jer úı bolǵan.
«Plantatsııaǵa jaqyn ushyp barý kezinde jalǵan memlekettik tirkeý nómirleri taǵylǵan eki «Toyota Land Cruiser» jol talǵamaıtyn kólikteri baıqaldy. Olar tikushaqtan úlken jyldamdyqpen qasha bastady. Daýys zoraıtqysh arqyly polıtsııa qyzmetkerleriniń toqtaý týraly talabyn elemedi. Avtokóliktiń sońyna túsken qyzmetkerler ony toqtatý úshin kóliktiń aldyna jáne birneshe ret dóńgelekterine oq atty. Dóńgelekterine zaqym kelgen soń ǵana eki kólik qozǵalysyn toqtatty. Polıtsııa qyzmetkerleri jergilikti úsh turǵyndy ustady. Olardy ustaý kezinde bireýi jaraqat aldy. Oǵan alǵashqy medıtsınalyq kómek kórsetildi jáne medıtsınalyq mekemege jetkizildi. Onyń ómirine qazirgi ýaqytta esh qaýip tónip turǵan joq. Atalǵan jerde Qyzylorda oblysynyń Polıtsııa departamentiniń jedel-tergeý toby jumys istep jatyr», - dedi polıtsııadan.
Eske salaıyq, respýblıka aýmaǵynda 1 maýsymnan bastap 30 qazanǵa deıin «Qarasora» arnaıy operatsııasy ótkizilip jatyr. Onyń sheńberinde quramynda esirtki bar ósimdikterdiń zańsyz ósirilgen alqaptaryn anyqtaý úshin tikushaqty paıdalaný, joǵary jyldamdyqtaǵy avtokólikteri bar mobıldi toptardy jumyldyrý kózdelgen. Operatsııa bastalǵaly barlyǵy 430 esirtki qylmysy anyqtaldy, onyń ishinde 178-i – quramynda esirtki bar ósimdikterdi zańsyz ósirýge, 153-i – satýǵa, 83-i – saqtaýǵa qatysty. Sondaı-aq esirtki kontrabandasynyń 5 faktisi anyqtaldy. Zańsyz aınalymnan jalpy 9 tonna esirtki alyndy.