Djıbýtı jaǵalaýynda mıgranttar mingen qaıyq aýdarylyp, 139 adam qaza tapty
ASTANA. KAZINFORM – Djıbýtı jaǵalaýynda 305 mıgrant mingen qaıyq aýdarylyp, keminde 139 adam qaza tapty. Olardyń arasynda 15 bala bar. Taǵy 84 adam iz-túzsiz joǵalǵandar qatarynda, dep habarlaıdy DW BUU-nyń Halyqaralyq kóshi-qon uıymyna (HKU) silteme jasap.
Uıymnyń 11 qazanda taratqan málimetine sáıkes, qaıyq Djıbýtıden Iemenge bet alǵan. Apat 9 qazanǵa qaraǵan túni Djıbýtıdiń Obok portty qalasyna jaqyn jerde bolǵan.
Qaıyqta bolǵan 305 adamnyń 82-si aman qalǵan. Olardyń barlyǵy – Efıopııa azamattary. BUU ókilderi oqıǵaǵa qatysty alǵashqy málimetter tiri qalǵan adamdardyń sózderine súıenip jınalǵanyn habarlady.
– Bizdiń qyzmetkerler jergilikti bılik ókilderimen birge oqıǵa ornynda jumys istep, zardap shekkenderge shuǵyl kómek kórsetip jatyr. Bul qaıǵyly oqıǵa ekonomıkalyq múmkindikter izdep, osy baǵytpen saparǵa shyǵatyn mıgranttardyń qanshalyqty úlken qaýipke tap bolatynyn taǵy bir márte kórsetti, – dedi Halyqaralyq kóshi-qon uıymynyń Djıbýtıdegi mıssııasynyń basshysy Aleksandr Kýassak.
Qazir Djıbýtı bıligi izdestirý-qutqarý jumystaryn jalǵastyryp jatyr. Aman qalǵandarǵa medıtsınalyq kómek kórsetilýde. Qaza tapqandardy jerleý jumystary da uıymdastyrylǵan.
Reuters agenttiginiń málimetinshe, sońǵy ýaqytta Efıopııadan ketýge májbúr bolǵan adamdar sany artyp keledi. Buǵan eldegi qarýly qaqtyǵystardyń qaıta órshýi, azamattardy qarýly jasaqtarǵa kúshtep tartý jáne qurǵaqshylyq áser etken.
Mıgranttar aldymen Iemenge jetip, keıin Parsy shyǵanaǵyndaǵy basqa elderge ótýdi kózdegen. Alaıda Iemenniń ózinde de Saýd Arabııasy qoldaıtyn úkimet kúshteri men Iran qoldaıtyn hýsıtter arasyndaǵy qaqtyǵystardyń kúsheıýine baılanysty halyq elden ketip jatyr.
BUU birneshe jyldan beri Djıbýtı arqyly ótetin «Shyǵys kóshi-qon baǵyty» boıynda mıgranttar aǵynynyń joǵary ekenin tirkep keledi.
Bul baǵytta adamdar teńiz apattaryna, adam saýdasyna jáne qurlyqqa jetkennen keıin zańsyz ustalý qaýpine tap bolady.
Halyqaralyq kóshi-qon uıymynyń Missing Migrants Project jobasynyń dereginshe, 2025 jyly atalǵan baǵytta 900-den astam mıgrant qaza tapqan nemese iz-túzsiz joǵalǵan. Soǵan qaramastan, osy jolmen saparǵa shyǵatyn adamdar sany 18 paıyzǵa artqan.
Aıta keteıik, buǵan deıin Iemen jaǵalaýynda Efıopııadan shyqqan mıgranttar mingen qaıyq sýǵa batyp, keminde 76 adam qaza tapqan bolatyn. Apat Aden shyǵanaǵynda bolǵan.
