Djeıms Kleverlı Qazaqstan men Ulybrıtanııa yntymaqtastyǵynyń basym baǵyttaryn atady
«Qańtar oqıǵasynan keıin biraz jumystyń atqarylǵanyn bilemin. Ádilettilikke qol jetkizý óte mańyzdy. Memlekettik reformalardan adam quqyqtaryn qorǵaýǵa degen umtylysty kórip otyrmyz. Brıtandyq kompanııalar men ınstıtýttardyń, sondaı-aq brıtan tájirıbesiniń Qazaqstannyń strategııalyq sektorlary, onyń ishinde munaı-gaz jobalaryn qurýda úlken ról atqaratynyn maqtan tutamyn. Joǵary bilim berý salasynda ýnıversıtettermen tyǵyz seriktestik ornaǵan. Odan bólek, aǵylshyn quqyǵy negizinde jumys isteıtin jáne aǵylshyn sýdıalary qoldaıtyn «Eır Astana» áýekompanııasy, Astana halyqaralyq qarjy ortalyǵy jumys isteıdi», - dedi Djeıms Kleverlı Syrtqy ister mınıstrliginde ótken resmı kezdesýden keıin BAQ ókilderiniń saýalyna jaýap bere turyp.
Ulybrıtanııa syrtqy ister mınıstriniń málimdeýinshe, búginde ekijaqty saýda-ınvestıtsııalyq seriktestik ártaraptandyrylyp keledi.
«Qazaqstanda sırek kezdesetin metaldar boıynsha resýrs mol. Sonymen qatar, sizdiń el azyq-túlik qaýipsizdiginde úlken ról atqarady. Bul – biz seriktestikti nyǵaıtqymyz keletin salalar. Sırek kezdesetin metaldar men mańyzdy shıkizat aıasynda seriktestikti ilgeriletý jónindegi memorandýmǵa qol qoıǵanymyzǵa qýanyshtymyz. Óz kezegimizde Qazaqstanǵa eń úzdik brıtandyq sıyr etin ákeletin bolamyz.
Ulybrıtanııanyń kómirtegi beıtaraptyǵy boıynsha jetekshi tehnologııalary eki eldiń jasyl ekonomıkasyn ártaraptandyrý men keńeıtýge kómektesedi. Qazaqstan men Ulybrıtanııanyń úzdik tájirıbelerin ózara almasý úshin seriktestikti keńeıtkimiz keledi. Odan bólek, biz sýtegi tehnologııalary boıynsha tájirıbe almasý týraly memorandýmǵa qol qoıdyq», - dedi Ulybrıtanııa mınıstri.
Aıta keteıik, búgin Ulybrıtanııanyń Syrtqy ister mınıstri Djeıms Kleverlı alǵash ret resmı saparmen Qazaqstanǵa keldi.
