Djeıms Kemeron «Tıtanık» pen «Tıtan» batıskafynyń apatynda uqsastyq baryn aıtty
NЬıÝ-IORK. QazAqparat – «Tıtanık» fılmin túsirgen kınorejısser Djeıms Kemeron laınerdiń apatqa ushyraýy men Atlant muhıtynan synyqtary tabylǵan «Tıtan» batıskafy tragedııasy arasyndaǵy uqsastyqqa tańqaldy, dep habarlaıdy QazAqparat abc.com-ge silteme jasap.
Kemeron súńgýir qaıyqtar salasy mamandarynyń «Tıtandy» qurastyrǵan OceanGate Expeditions kompanııasyna birneshe ret hat jazǵanyn aıtady. Málimdeýinshe, olar sýasty apparatyn sertıfıkattaý qajettigin eskertken.
«Men bul oqıǵanyń «Tıtanık» apatymen uqsastyǵyna tańqaldym. Keme kapıtanyna da baǵyt alǵan jolynda muzdardyń bary birneshe ret eskertilgen, al ol soǵan qaramastan, aısyz túnde tolyq jyldamdyqpen júzýin toqtatpady. Aıaǵynda kóp adam qaıtys boldy. Qazir de eskertýler qulaqqa ilinbeı, dál sol jerde, sol oqıǵaǵa uqsas tragedııa bolyp otyr», - dedi Kemeron.
Eske salsaq, shaǵyn súńgýir qaıyqpen «Tıtanıkke» attanǵan 5 adam joǵalyp ketken bolatyn.Kúni keshe AQSh jaǵalaý kúzeti Soltústik Atlant muhıtynda joǵalyp ketken «Tıtan» súńgýir qaıyǵyn izdestirý aımaǵynan áldebir júzý quralynyń jaryqshaqtary men synyqtary tabylǵanyn habarlady. Bortta bolǵan bes adam da qaza tapqan.
