Djeıms Kemeron «Tıtan» batıskafynyń apaty týraly serıal túsirmek

LOS-ANDJELES. QazAqparat – «Tıtanık» blokbasterin túsirgen Djeıms Kemeron «Tıtan» batıskafynyń apaty týraly dramalyq telehıkaıa túsirý týraly kelissózder júrgizip jatyr, dep habarlaıdy QazAqparat The Sun-ǵa silteme jasap.

Insaıderlerdiń málimetinshe, strımıng servısteriniń biri Tıtanık qaldyqtaryna 30 ret túsken tanymal rejısserge ótken aıda sýasty qaıyǵynda qaza tapqan bes adamnyń oqıǵasy týraly aıtyp berý úshin ótinish jasaǵan.

«Tıtan» apatyn álemdegi eń iri strımıng servısteriniń biri telehıkaıa retinde, al Kemerondy – rejısser retinde qarastyryp jatyr.

Derekkózdiń aıtýynsha, bul taqyryp onyń júregine jaqyn. Serıaldyń túsirilimine kóp qarajat, ýaqyt jáne resýrs qajet.

Gollıvýd akteri Mett Deımon, sondaı-aq Marvel juldyzy Kýmeıl Nandjıanıdy serıalda basty rólderdi somdaýǵa shaqyrǵysy keletin akterlerdiń tiziminde.

Kanada týmasy Kemeron 1998 jyly «Tıtanık» fılmi úshin úsh «Oskar» syılyǵyn jeńip aldy. Sondaı-aq, ol sýasty zertteýi boıynsha sarapshy.

Buǵan deıin QazAqparat 19 maýsym kúni «Tıtanık» kemesi sýǵa batqan aımaqqa sapar jasaıtyn «Tıtan» súńgýir apparaty Atlant muhıtynda joǵalyp ketkenin habarlaǵan edi. 22 maýsymda AQSh-tyń Jaǵalaý qyzmeti joǵalǵan «Tıtan» batıskafyn izdeý aýmaǵynda qırandylar tabylǵanyn málim etti. Keıin súńgýir apparaty tıesili OceanGate kompanııasy málimdeme jasap, batıskafta bolǵan ekıpaj qaza bolǵanyn habarlady.

Batıskaf bortynda 5 adam boldy: 58 jastaǵy brıtandyq bıznesmen ári zertteýshi Hemısh Hardıng, 48 jastaǵy bıznesmen, pákistandyq Shahzada Davýd pen onyń 19 jastaǵy uly Sýleman, OceanGate kompanııasynyń 61 jastaǵy dırektory Stokton Rash jáne 77 jastaǵy frantsýzdyq zertteýshi Pol-Anrı Narjole.