Djeıms Kemeron álemniń eń tereń shuńǵymasyna súńgip shyqty
ASTANA. 27 naýryz. QazAqparat - Gollıvýdtyń belgili rejısseri Djeıms Kemeron álemdegi eń tereń núkte - Marıana shuńǵymasynyń túbine jasaǵan saıahatyn sátti aıaqtap, Tynyq muhıttyń betine shyqty,
dep habarlaıdy RBK saıty sheteldik BAQ-qa silteme jasap.
«Tıtanıktiń» rejısseri bul saıahatyn kópten beri josparlap júrgen edi. Kemeron bul saparyn arnaıy jasaqtalǵan Deepsea Challenger batıskafymen jasady. Batıskaf shuńǵymanyń túbine deıin 2 saǵat boıy júzip barǵan. Rejısser jer betindegi eń tereń shuńǵyma men onyń «turǵyndaryn» arnaıy qurylǵylar arqyly 3D formatynda túsirip aldy.
Kemeronǵa deıin Marıana shuńǵymasynyń túbine eki-aq adam jetken. 1960 jyly shveıtsarlyq ınjener Jak Pıkar men AQSh teńiz flotynyń kapıtany Don Ýolsh shuńǵyma túbinde 20 mınýttaı bolyp qaıtqan. Alaıda olar kemeleriniń ekpininen laılanyp ketken eń tereń núkteni durys zertteı almaǵan kórinedi.
