Djeıkobs Golovkınnen ne sebepti jeńilgenin aıtty
ASTANA. QazAqparat - WBA nusqasy boıynsha orta salmaqta burynǵy «turaqty» álem chempıony Denıel Djeıkobs endi judyryq túıistirer bolsa, Gennadıı Golovkındi utatynyna senimdi, dep habarlaıdy Sports.kz.
Amerıkalyq sportshynyń pikirinshe, birinshi aıqastyń ózinde-aq ol jeńiske jetýge qajettiniń bárin jasaǵan, alaıda tóreshiler basqasha sheshim shyǵarǵan. «Eki raýndta aıqyn basymdyqqa ıe bolǵanymdy sezdim, biraq tóreshiler basqasha sheshim shyǵardy. Golovkın qýatty pancher retinde tanymal, al tóreshilerge shabýyldaı júrip urys salatyn boksshylar unaıdy. Bul men ustanatyn «ur da, soqqy alma» degen naǵyz bokstyń mánine qaıshy keledi. Men kóbirek dál soqqy bergenim týraly kóp aıtyldy (144-126). Boksshy retinde men basym tústim, biraq menen góri kóbirek djeb jasaǵan (105-32) Golovkınge qurmetimdi bildiremin», - deıdi Denıel Djeıkobs Premierboxingchampions.com portalyna bergen suhbatynda.
«Eń kemi teń nátıje bolý kerek edi. Jekpe-jekke baryńdy salasyń, al tóreshiler oıyńdaǵydaı sheshim shyǵarmaıdy. Bul ashýyńdy keltiredi. Sol aıqastaǵy kúshter arasalmaǵy 50/50 boldy, kelesi joly kezdeskende men mindetti túrde Golovkındi jeńemiz. GGG-di nokaýtqa jiberý óte qıyn, biraq meniń áldeqaıda jyldam judyryqtasatynym belgili. Men jekpe-jektiń basynan-aq agressııa tanytýym kerek. Eger men kóbirek qysym kórsetip, oǵan qarsy nyq turyp, djebterinen jaltara alǵanymda, tóreshilerdiń sheshimimen jeńiske jetken bolar edim», - dep sanaıdy boksshy.
Eske sala keteıik, Golovkın - Djeıkobs kezdesýinde tóreshiler jeńisti bir aýyzdan qazaqstandyq bylǵary qolǵap sheberine bergen bolatyn.
