Djeıkobs Golovkınnen alyp qoıylǵan IBF beldigi úshin rıngke shyǵýdan bas tartpaq
ASTANA. QazAqparat - Denıel Djeıkobstyń promoýteri Eddı Hırn Gennadıı Golovkınnen alyp qoıylǵan IBF tıtýly úshin Sergeı Derevıanchenkoǵa qarsy ótetin jekpe-jekten bas tartýy múmkin ekenin aıtty, dep habarlaıdy «SPORTINFORM» SAA allboxing.ru-ǵa silteme jasap.
Eddı Hırn jekpe-jektiń Djeıkobspen kelisimshart jasasqan NVO telearnasy arqyly kórsetilýin talap etip otyr.
5 shildege belgilengen saýdada jeńip shyqqan promoýter túrli telearnalardyń usynystaryn tańdaý quqyǵyna ıe bolady. Óz kezeginde Derevıanchenkonyń promoýteri Lý Dıbella da osyǵan úmit artyp otyr.
Biraq Hırnniń aıtýynsha, eger jekpe-jekti basqa telearna translıatsııa jasasa, Djeıkobs rıngke shyqpaıtynyn málimdedi. Ondaıda IBF Derevıanchenko úshin basqa qarsylas izdeıdi.
Eske sala keteıik, maýsym aıynyń basynda Halyqaralyq boks federatsııasy (IBF) qazaqstandyq boksshy Gennadıı Golovkınndi (38-0-1, 34 KO) álem chempıony ataǵynan aıyrǵan bolatyn.
Araǵa bir apta salyp, IBF qaýlysyna sáıkes, bos turǵan tıtýlǵa ýkraındyq Sergeı Derevıanchenko (12-0, 10 KO) men uıym reıtınginde 3-orynda turǵan, amerıkalyq eks-chempıon Denıel Djeıkobs (34-2, 29 KO) talasatyny habarlanǵan.
