Djeı Lonyń kontsertine qýana-qýana baramyn — Balaeva súıikti ártisteri týraly aıtyp berdi

ASTANA. KAZINFORM — Mádenıet jáne aqparat mınıstri Aıda Balaeva bıznestiń sheteldik juldyzdar kontsertterin uıymdastyra bastaǵanyn jáne olarǵa barynsha qoldaý kórsetiletinin aıtty.

Úkimet úıinde mınıstr sheteldik juldyzdar kontsertterin uıymdastyratyn kommertsııalyq uıymdardyń bar ekeni qýantatynyn aıtty. Bul sózsiz Qazaqstannyń shetelde tanymal bolýyna áser etedi.

— Mınıstr retinde meni bıznestiń osy uıymdastyrýmen aınalysatyny qýantady jáne biz bul bastamalardy barynsha qoldaımyz. Árıne, bizde ondaı qarajat joq, sondyqtan olardyń bastamalaryna qoldaý kórsetemiz. Men Djennıfer Lopestiń kontsertine barǵym keledi. Sebebi, onyń úlken aýdıtorııasy bar, ári búkil álem moıyndaǵan talanty bar. Kontsertti kórgim keledi, sol úshin bılet satyp aldym jáne balalarymmen birge barýdy josparlap otyrmyn, — dedi Aıda Balaeva.

Sonymen birge, tilshiler mınıstrdiń taǵy qandaı ártisterdiń kontsertine barǵysy keletinin surady.

— Ondaı oryndaýshylar óte kóp. Mysaly, Shakırany kórýge bolar edi nemese meniń súıikti ánshim Lara Fabıandy kórgim keledi. Sondyqtan, elimizde osyndaı kontsertter kóbirek ótse eken deımin. Nege ınvestıtsııa tarttyńdar dep synaıtyn adamdar da bar. Biraq bul shyn máninde mýltıplıkatıvti áser beredi, óıtkeni oryndaýshylardyń jankúıerleri Qazaqstanǵa kelip, qonaq úılerimizde turady, mádenı mekemelerimizge, meıramhanalarymyzǵa barady, al bul qarjy salyq retinde elimizde qalady. Sondyqtan mundaı isker adamdardyń bastamalaryn tek qoldaý kerek, — dedi Aıda Balaeva.

Buǵan deıin Astana men Almatydaǵy mýzykalyq is-sharalar afıshasy jarııalanǵan edi. 

Al 1 tamyzda amerıkalyq aktrısa ári ánshi Djennıfer Lopes «Up All Night» týry aıasynda «Astana Arenada» óner kórsetedi.