Djeı Lonyń Astanadaǵy kontsertinde tártip buzǵan áıelge aıyppul salyndy

ASTANA. KAZINFORM — Djennıfer Lopestiń elordadaǵy kontsertinde qoǵamdyq tártipti buzǵan kóp balaly ananyń isi Astana qalasynyń ákimshilik quqyqbuzýshylyqtar jónindegi mamandandyrylǵan aýdanaralyq sotynda qaraldy.

Sottyń málimetinshe, is usaq buzaqylyq deregi boıynsha qaralǵan. Sot 2025 jylǵy 1 tamyz kúni saǵat 21:00 shamasynda K. esimdi azamatsha «Astana Arena» stadıonynda kórermen retinde bolyp, ózin agressıvti ustaǵanyn, aınalasyndaǵylardy ıterip, qoǵamdyq tártipti buzǵanyn jáne is-sharaǵa kelgen ózge adamdarǵa qolaısyzdyq týdyrǵanyn anyqtady.

Onyń kinási kýágerlerdiń sózimen, ákimshilik quqyq buzýshylyq týraly hattamamen, sondaı-aq oqıǵa ornynan alynǵan beınejazbamen dáleldendi.

Sotta QR Ákimshilik quqyq buzýshylyq týraly kodekstiń 434-baby 1-bóliginiń sanktsııasy — 20 AEK mólsherinde aıyppul salýdy, 20-dan 60 saǵatqa deıingi qoǵamdyq jumystardy nemese 5-ten 15 táýlikke deıingi ákimshilik qamaqqa alýdy kózdeıtini eske salyndy. Alaıda azamatshanyń 14 jasqa tolmaǵandardy qosa alǵanda bes balasy bolǵandyqtan, QR Ákimshilik quqyq buzýshylyq týraly kodekstiń 50-babyna sáıkes oǵan ákimshilik qamaq qoldanylmaıdy.

Іsti qaraý qorytyndysy boıynsha áıel kináli dep tanylyp, oǵan 20 AEK mólsherinde, ıaǵnı 78 640 teńge mólsherinde aıyppul salý túrindegi jaza taǵaıyndaldy. Sot qaýlysy ázirge zańdy kúshine engen joq.

Eske sala keteıik, bıylǵy tamyz aıynda Astanada Djeı Lonyń kontsertinde tártip buzǵan áıelge qatysty qylmystyq is qozǵaldy. Keıinnen ol áıel Pavlodar oblystyq polıtsııa departamenti bastyǵy orynbasarynyń jary ekeni anyqtaldy.