Djeı Lonyń Almatydaǵy kontsertinde qazaqstandyq jabdyq qoldanylady
ALMATY. KAZINFORM — Almatyda 10 tamyz kúni álemdik pop-juldyz Djennıfer Lopestiń kontserti ótedi.
First Media Group kompanııasynyń basqarýshy dırektory ári kontsert uıymdastyrýshysy Alfııa Nurǵumarovanyń aıtýynsha, Ortalyq stadıonda montajdaý jumystary «Qaırat» pen «Slovan» arasyndaǵy fýtbol matchy aıaqtalǵannan keıin birden bastalǵan.
— Jabdyq — ózimizdiki. Biz seriktes retinde barlyq tehnıkany usynamyz. Salystyrmaly túrde Astanada qurylys-montajdaýǵa 6 kún ketti, al bizde bar bolǵany 3 kún. Sondyqtan jumystar táýlik boıy, úsh aýysymda júrip jatyr. Bir túnniń ishinde-aq úlken kólemdegi jumysty atqardyq, — dedi ol.
Sonymen qatar is-shara uıymdastyrýshysy Abaı — Baıtursynov kósheleri qıylysynda qosymsha LED-ekrandar ornatylatynyn atap ótti. Aıtýynsha, onda stadıonǵa kirý syzbalary kórsetiledi. Sonymen qatar ekrandarda qazaq, orys jáne aǵylshyn tilderinde nusqaýlyǵy bar beınerolık oınatylmaq.
Kórermenderdi stadıon mańyndaǵy aımaqqa kirgizý saǵat 15:00–de bastalady. Onda tamaqtaný oryndary jáne ózge de servıs aımaqtary jumys isteıdi. Alaıda negizgi aımaqqa kirý tek saýndchek aıaqtalyp, ánshiniń tehnıkalyq toby ruqsat bergennen keıin ǵana bastalady.
— Biz ártis tobynyń ruqsatynsyz qaqpany ashyp, kórermenderdi kirgize almaımyz. Mysaly, Astanada bul ýaqyt bir jarym saǵatqa keshikti. Munyń bári uıymdastyrýshylarǵa emes, ártis tobyna baılanysty: keıde olar repetıtsııany uzarta alady, — dep túsindirdi Alfııa Nurǵumarova.
Djennıfer Lopestiń komandasy Almatyǵa jeke ushaqpen keledi. Delegatsııa quramynda shamamen 90 adam bar.
Eske salaıyq, buǵan deıin Almatyda Djeı Lo kontsertine daıyndyq qalaı júrip jatqanyn jazǵanbyz. Jalpy kontsert kezinde qoǵamdyq qaýipsizdikti qamtamasyz etý úshin 2960 qyzmetker jumyldyrylady. Onyń ishinde 2240 polıtsııa qyzmetkeri, 600 áskerı qyzmetker, 120 jeke kúzet agenttigi ókilderi jáne 300 erikti bar.
Buǵan deıin Djeı Lo kontserti kezinde Almatyda qandaı kósheler jabylatynyn jazǵanbyz.
Álemdik pop-juldyz 1 tamyz kúni «Astana Arena» stadıonynda jeke kontsert berdi.