Djeı Lo men Backstreet Boys kontsertteri meıramhanalar men dámhanalardyń saýdasyn 11% arttyrdy — Ulttyq bank
ASTANA. KAZINFORM — Ulttyq bank óz tájirıbesinde alǵash ret halyqaralyq deńgeıdegi mádenı sharalardyń eldegi ekonomıkaǵa áserin baǵalady. Osy baǵalaýǵa súıensek, Djennıfer Lopes pen Backstreet Boys kontsertteri Astana men Almatydaǵy meıramhana, dámhanalardyń saýdasyn 11 paıyzǵa deıin arttyrǵan.
— 2025 jyldyń úshinshi toqsanynda Astana men Almatyda tanymal halyqaralyq oryndaýshylardyń (Jennifer Lopez, Backstreet Boys) kontsertteri tutynýshylyq belsendiliktiń jergilikti ósýine yqpal etti. …Alynǵan baǵalaýlarǵa sáıkes, álemdik deńgeıdegi oryndaýshylardyń kontsertteri tamaq qyzmeti salasyndaǵy alshaqtyqtyń ártis pen qabyldaýshy qalaǵa baılanysty 5-11%-ǵa artýyna ákeldi. Eń aıqyn áser Astana qalasynda baıqaldy: kontsertterdiń ótkizilýi qoǵamdyq tamaqtaný qyzmetteri kóleminiń alshaqtyǵyn shamamen 8,4%-ǵa arttyrdy. Astana qalasynda ótken Backstreet Boys kontsertiniń áseri qyzmet kólemi boıynsha da, bólshek saýdada da magnıtýdasy jaǵynan birshama joǵary boldy. Atalǵan kontsert ótken kezeńde Astana qalasynda ózge de buqaralyq is-sharalardyń (Astana Finance Days) qatar ótkenin eskerý qajet. Bul qoǵamdyq tamaqtaný naryǵyndaǵy jergilikti belsendilikti qosymsha kúsheıtken bolýy múmkin, — dep jazylǵan qujatta.
Biraq Ulttyq bank sarapshylary bul faktor baǵanyń ósýine yqpal etti dep naqty boljaýǵa kelmeıtinin eskertedi.
— Alynǵan nátıjeler tutynýshylyq belsendiliktiń mundaı qysqamerzimdi serpini baǵa serpinine de jergilikti deńgeıde áser etýi múmkin ekenin kórsetedi, alaıda bul boljam jeke qosymsha taldaýdy talap etedi, — delingen Ulttyq bank málimetinde.
Buǵan deıin Djeı Lo kontserti Almatyǵa 10 mlrd teńge tabys ákelgenin jazǵan edik.