Djeı Lo Almatydaǵy kontsert pen shegirtkeni esine aldy
ALMATY. KAZINFORM — «Djımmı Fellon shoýy» baǵdarlamasynda Djennıfer Lopes Almatyda ótken kontsertin esine aldy.
Ol kontsert kezinde moınyna qonǵan shegirtke týraly pikir bildirdi. Aıtýynsha, ánshi denesinde bir nárseniń qozǵalysyn sezgen, biraq qaıtse de ánin aıaqtaýǵa tyrysqan.
— Men bir nárse bolyp jatqanyn sezdim. Basynda jándik ushyp-qonyp júr eken dep oıladym. Óıtkeni jaryqtan olardy buryn baıqaǵan edim. Alaıda ol denemde joǵary órmelep kele jatyr eken. Bir kezde moınyma keldi, kishkentaı aıaqtary sezildi. Men ne bolsa da ándi aıaqtaıyn dep oıladym. Keıin ony denemen syrǵytyp túsirgende tikushaqtaı úlken ekenin kórdim, — dedi pop-juldyz.
Eske salaıyq, 10 tamyz kúni Almatyda Djeı Lo kontsert berip, 27 myń kórermen jınaldy. Onyń 7 myńy — 35 memleketten arnaıy kelgen sheteldikter.
Qala ákimdiginiń málimetinshe, kontsert Almatyǵa 10 mlrd teńge tabys ákeldi.