Djeı Lo kontserti: Ortalyq stadıonda sahnany qurýǵa 220 maman tartyldy
ALMATY. KAZINFORM – Almatyda 10 tamyz kúni álemdik pop-juldyz Djennıfer Lopestiń kontserti ótedi.
Almaty ákimdiginiń málimetinshe, Ortalyq stadıonda halyqaralyq standarttarǵa saı, kópdeńgeıli, aýqymdy sahna ornatylyp jatyr. Daıyndyqqa berilgen 3 kún ishinde 220-dan astam tehnık-maman — montajshylar, ınjenerler, úılestirýshiler táýlik boıy eńbek etip jatyr.
Uıymdastyrýshylar qala qyzmetterimen birlese otyryp, qaýipsizdik pen logıstıkanyń negizgi qyrlaryn da pysyqtaýda. Kontsert kúni stadıon birneshe aımaqtarǵa bólinedi: fan-aımaqtar, laýnj-aımaqtar, fýd-korttar, VIP jáne medıa aımaqtar. Qaýipsizdik pen jaılylyqty qamtamasyz etý úshin medıtsınalyq brıgadalar, tótenshe jaǵdaı qyzmetkerleri jáne órt sóndirý toptary kezekshilik atqarady. Kirý qaqpalaryna metall detektorlar men qol skanerleri bar 26 baqylaý-ótkizý pýnkti ornatylady.
- Kontsert bıletteri tolyq satylyp ketti. Olardy AQSh pen Japonııadan bastap, BAÁ men Kanadaǵa deıingi 35-ten astam eldiń kórermenderi jáne myńdaǵan qazaqstandyq satyp aldy. Mundaı halyqaralyq qyzyǵýshylyq týrızm men kreatıvti ekonomıkanyń qýatty draıverine aınalyp, Almatynyń aımaqtyń mádenı astanasy retindegi mártebesin nyǵaıtady. Bul jaı kontsert emes, Qazaqstan úshin tarıhı sát: tehnologııa, sheberlik pen energııanyń toǵysýy, ol qalanyń jylnamasyna altyn áriptermen jazylady», —dedi First Media Group dırektory Alfııa Nurǵumarova.
Eske salaıyq, jalpy kontsert kezinde qoǵamdyq qaýipsizdikti qamtamasyz etý úshin 2960 qyzmetker jumyldyrylady. Onyń ishinde 2240 polıtsııa qyzmetkeri, 600 áskerı qyzmetker, 120 jeke kúzet agenttigi ókilderi jáne 300 erikti bar.
Buǵan deıin Djeı Lo kontserti kezinde Almatyda qandaı kósheler jabylatynyn jazǵanbyz.
Sondaı-aq Ortalyq stadıonǵa arnaıy avtobýstar qaı jaqtan qatynaıtynyn jazǵan edik.
Álemdik pop-juldyz 1 tamyz kúni «Astana Arena» stadıonynda jeke kontsert berdi.
