Djeı Lo kontserti Almatyǵa 10 mlrd teńge tabys ákeldi

ALMATY. KAZINFORM – Almatyda ótken Djennıfer Lopestiń kontsertine 27 myń kórermen jınalǵan. Onyń 7 myńy – 35 memleketten arnaıy kelgen sheteldikter.

– Uıymdastyrýshylardyń aldyn ala jasaǵan esebi boıynsha bul is-sharadan bıýdjetke túsetin salyq kólemi 600 mln teńge shamasynda bolmaq, - dep habarlady Almaty ákimdigi.

Qala ákimdigi málimetinshe, is-sharanyń qala ekonomıkasyna tıgizgen áseri aýqymdy. Sheteldik týrıster Almatyda orta eseppen úsh jarym kún aıaldap, táýligine shamamen 440 dollardy qonaqúı, tamaq, kólik, ekskýrsııa jáne saýdaǵa jumsaǵan. Kontsert kúni tek sheteldik qonaqtar qalaǵa shamamen 5 mlrd teńgeden astam tabys ákelgen.

– Kontsert ótken kúni stadıon aýmaǵyndaǵy fýd-kort 15 mıllıon teńge tabys tapqan. Týrızm basqarmasynyń boljamyna sáıkes, kórermenderdiń shyǵyny men janama kiristerdi qosa eseptegende, kontsertten qalaǵa túsken tabys aınalymy 10 mlrd teńgeden asady. Mundaı mádenı is-sharalar qala qazynasyna qomaqty kiris ákelip qana qoımaı, Almatynyń týrıstik tartymdylyǵyn arttyryp, ony álemdik gastrol kartasyndaǵy mańyzdy ortalyq retinde nyǵaıtady, - dep habarlady ákimdikten.

Eske salaıyq, 1 tamyz kúni Djeı Lo «Astana Arena» stadıonynda jeke kontsert berdi. 

Al 10 tamyz kúni Djennıfer Lopes Almatynyń Ortalyq stadıonynda jeke kontsertin ótkizdi. 

Buǵan deıin Almatydaǵy Ortalyq stadıon kógaly Djeı Lo kontsertinen keıin qandaı kúıde ekenin jazǵanbyz.