Djet Lıge qazaqsha til bitti - «Mýlan» fılminiń premerasy
ALMATY. QazAqparat - Almatyda «Mýlan» fılminiń premerasy ótti. Bul «Bolashaq» qory dýblıajdaǵan mereıtoılyq 35-shi fılm boldy, dep habarlaıdy QazAqparat tilshisi.
1998 jylǵy anımatsııalyq fılmniń remeıki dúnıejúzilik prokatka osy jyldyń qyrkúıek aıynda shyqqan edi. Alaıda, fılmdi úlken ekrannan kınoteatrlar ashylǵan Qazaqstannyń
tórt qalasynyń turǵyndary ǵana tamashalaı alatyn bolady.
Qazaqstan Respýblıkasynyń eńbek sińirgen qaıratkeri alǵash ret Disney fılminde oınady. Ol jaı akter emes, «Nomad Stunts» halyqaralyq kásibı kaskaderler tobynyń
jetekshisi, trıýk qoıýshy - Jaıdarbek Kúnǵojınov. Jaıdarbek pen onyń juldyzdy komandasy búkil álemge tanymal. «Mýlan» fılminde Jaıdarbek «arlandar» jasaǵynyń qolbasshysy rólin, al onyń toby Djeıson Skott Lı somdaǵan Bóri hannyń tańdaýly jaýyngerler jasaǵynda oınady.
18 jeltoqsanda Almatyda «Nur Otan» partııasy men «Kinopark» kompanııasynyń qoldaýymen fılmniń qazaq tilinde arnaıy kórsetilimi ótti. Arnaıy kórsetilimniń qonaqtary arasynda joba uıymdastyrýshylary, medıa-tulǵalar, qoǵamdyq uıymdardyń jetekshileri jáne blogerler boldy. Fılmniń arnaıy kórsetilimi bastalmas buryn «Nomad Stunts» kaskaderleri, aktrısalar Aıgúl Imanbaeva men Janel Maqajan, sondaı-aq «Bolashaq» qorynyń Qamqorshylyq keńesiniń tóraıymy Dınara Shaıjúnisovanyń qatysýymen baspasóz máslıhaty ótti.
Akter ári kaskader Jandos Aıbasov, dýblıaj akterleri fılmmen jumys jasaýdyń erekshelikteri týraly aıtyp, jýrnalısterdiń suraqtaryna jaýap berdi.
Arnaıy kórsetilim barysynda sóz sóılegen «Bolashaq» qory Qamqorlyq keńesiniń qurmetti múshesi jáne «Nur Otan» partııasy Tóraǵasynyń birinshi orynbasary Baýyrjan Baıbek Qazaqstan Respýblıkasynyń Tuńǵysh Prezıdenti Nursultan Nazarbaev el Táýelsizdigin jarııalaǵan sátten bastap memlekettik tildiń qoldaný aıasyn keńeıtý, bilikti de bilimdi jastardyń qataryn arttyrý, qazaq tilindegi sapaly aqparattyq ónimderdi kóbeıtý sekildi mańyzdy máselelerge erekshe nazar aýdaryp, basymdyq bergendigin atap ótti. Osy maqsatta el ekonomıkasy nyǵaıa qoımaǵan kezdiń ózinde 1993 jyly «Bolashaq» baǵdarlamasyn quryp, talapty da daryndy jastardyń álemdegi úzdik oqý ordalarynda
bilim alýyna jol ashty.
«Qazirgi tańda prezıdenttik «Bolashaq» baǵdarlamasy boıynsha bilim alǵan 14 myńǵa jýyq azamat elimizdiń ıgiligi jolynda jemisti qyzmet etip jatyr. Atalǵan baǵdarlama túlekteri qurǵan «Bolashaq» korporatıvtik qory elimizdiń zııatkerlik áleýetin kóterýdi maqsat etken túrli jobalardy iske asyrýda. Solardyń biri – qazaq tilindegi sapaly kontentti kóbeıtýge baǵyttalǵan «Ózińen basta» jobasy ekenin atap ótý kerek«, - deıdi Baýyrjan Baıbek.
«Mýlan» fılmin dýblıajdaý jumysyna Nur-Sultan, Almaty jáne Qaraǵandy qalalarynan 60-tan astam kásibı akter qatysty. Alǵash ret Gollıvýdtyń tanymal akterleri qazaq tilinde sóıledi. Mýlandy qazaq aktrısasy Janel Maqajan, al basty antagonıst sıqyrshy Sıannıandy Aıgúl Imanbaeva dybystady. Bul onyń jobadaǵy alǵashqy basty róli. Buǵan deıin belgili ártis «Oıynshyqtar Hıkaıasy 4» fılminiń dýblıajyna qatysqan bolatyn. Djet Lı Qazaqstannyń eńbek sińirgen qaıratkeri jáne Q.Qýanyshbaev atyndaǵy Memlekettik akademııalyq qazaq sazdy-drama teatrynyń akteri Boranbaı Moldabaevtyń daýysymen qazaqsha sóıledi. Djeıson Skott Lı áıgili akter
Asan Májıttiń daýysymen, al Ma Tsı akteriniń keıipkeri Baqytjan Álpeıisovtiń daýysymen ún qatty.
Sheteldik fılmderdi dýblıajdaý – memlekettik tildi damytý boıynsha mańyzdy áleýmettik joba. Jobanyń arqasynda qazaq tili Disney stýdııasynyń 39-shy tili jáne Sony Pictures stýdııasynyń 7-shi tili boldy. Dýblıaj salasynyń 203 mamany óz biliktiligin arttyrdy. Jobanyń basty qundylyǵy – balalar súıikti anımatsııalyq fılmderdi ana tilinde kórip, qazaq tilinen bilimderin jetildiredi.
