Djentlmender klýby aqtóbelik áıelge baspana syılady
«Oraza aıynyń sońǵy kúninde Djentlmender klýby asyraýshysynan aıyrylǵan otbasyǵa jaıly páter syılady. Bárine qol ushyn soza almasaq ta, naqty bir otbasyn baqytty ete aldyq. Beı-jaı qalmaǵan Qazaqstannyń ózge de azamattaryn bizden úlgi alýǵa shaqyramyz. Ómirdi jaqsartýǵa úles qosaıyq», - dep jazdy Klýb tóraǵasy A. Qashqynbekov áleýmettik jelide.
Arman Kashqynbekovtiń aıtýynsha, bul bastamaǵa Qazaqstannyń kóptegen qalalarynan aqshalaı kómek tústi. Bes myń, 100 myń, tipti 900 myń teńgege deıin qarjy bergender bar. Nátıjesinde - 10 kúnde 6 mln teńge jınalǵan. Endi olar bul ıgi istiń dástúrge aınalǵanyn qalaıdy.
«Klýb tóraǵasy Arman Qashqynbekov ekeýmiz Oraza aıynda qarajat jınap, bir kópbalaly anaǵa baspana syılasaq dep usynys jasap edik. Jigitter qoldaı ketip, qomaqty soma jınaldy. Árıne, neshe túrli nusqalar boldy. Jaǵdaıy qıyn analar kóp. Biraq, aqtóbelik kelinshektiń jaǵdaıy tym múshkil. Úsh balaly áıel, kúıeýi joq, tuńǵyshy múgedek, ózi de syrqattanyp, páter jaldap júr. Oǵan deıin Astana, Almaty syndy úlken qalalardan qarastyramyz dep oılaǵanbyz. Biraq aqtóbelik jigitter jınalǵan somanyń ústine taǵy qarjy qosyp, jóndeý jumystaryn moıynǵa alyp, Aqtóbe qalasynan páter alyp berdik. Muny «Asar» dep aıtýǵa bolady. «Rýhanı jańǵyrý» degendeı, qazaqtyń ejelgi dástúri - «Asardy» jańǵyrtýdyń bir túri dep esepteıik», - dedi Djentlmender klýbynyń múshesi Arman Shoraev QazAqparatqa bergen suhbatynda.
Qazaqstannyń Djentlmender klýbynda 257 adam bar. Oǵan bir qalanyń ǵana emes, Qazaqstannyń túpkir-túpkirinen jınalǵan azamattar múshe.
