Djensen Hýang NVIDIA basshysy qyzmetinen ketti

ASTANA. KAZINFORM – NVIDIA kompanııasynyń negizin qalaýshy Djensen Hýang bas dırektor qyzmetinen ketti. Onyń otstavkasy dereý kúshine endi. Bul týraly kompanııanyń Dırektorlar keńesiniń málimdemesinde aıtylǵan, dep habarlaıdy NVIDIA Newsroom saıty.

NVIDIA
Foto: NVIDIA

Kompanııany ýaqytsha qarjy dırektory Kolett Kress basqarady. Ol 2013 jyldan beri NVIDIA kompanııasynda jumys isteıdi. Buǵan deıin Kress Cisco jáne Microsoft kompanııalaryn qosa alǵanda, jetekshi tehnologııalyq kompanııalarda 25 jylǵa jýyq ýaqyt qarjy salasyndaǵy qyzmetterdi atqarǵan.

Sonymen qatar Dırektorlar keńesi jańa bas dırektordy izdeýdi bastady. Bul qyzmetke kompanııanyń ishki jáne syrtqy úmitkerleri qarastyrylady.

Kompanııa tarıhynda alǵash ret Dırektorlar keńesiniń tóraǵasy bolyp buǵan deıin Synopsys tehnologııalyq kompanııasyn basqarǵan Harvı Djons taǵaıyndaldy.

NVIDIA kompanııasynda Hýangqa kompanııanyń jáne tehnologııa salasynyń damýyna qosqan úlesi úshin alǵys bildirdi. Al Dırektorlar keńesi basshylyqtyń aýysýy kompanııanyń jumysyna, klıentter aldyndaǵy mindettemelerine jáne ónimderdi ázirleý josparlaryna áser etpeıtinine sendirdi.

Eske sala keteıik, qazan aıynyń sońynda NVIDIA kompanııasynyń burynǵy negizin qalaýshy ári bas dırektory Djensen Hýang Astanada ótken AI Month is-sharasyna arnaıy qonaq retinde qatysyp, Qazaqstanǵa alǵash ret kelgen edi.

Sondaı-aq NVIDIA-nyń eks-basshysy Qazaqstandy Physical AI álemdik habyna aınaldyrýdy usyndy.

Munyń aldynda Memleket basshysy Djensen Hýangty qabyldaǵanyn habarlaǵanbyz.

Keshe AQSh Ádilet mınıstrligi NVIDIA kompanııasyna qatysty úsh tergeý júrgizip jatqanyn jazdyq.