Djennıfer Lopestiń kontsertine qaıtalanyp satylǵan bıletterdiń quny óteledi

ASTANA. KAZINFORM – Ticketon.kz servısiniń negizin qalaýshy Alekseı Lı tehnıkalyq aqaý saldarynan álemdik ánshi Djennıfer Lopestiń kontsertine qaıtalanyp satylyp ketken bıletter úshin ótemaqy tóleýge ýáde etti.

Ticketon.kz saıtynda bılet satý kezinde bolǵan tehnıkalyq aqaýdyń sebebin servıs negizin qalaýshy Alekseı Lı Threads paraqshasynda túsindirdi. Ol paıdalanýshylardan keshirim surap, týyndaǵan qolaısyzdyqtar úshin ótemaqy berýge ýáde etti.

Alekseı Lıdiń aıtýynsha, serverdiń qýattylyǵyn úsh ese arttyrýǵa qaramastan, saıt júktemege shydas bermegen, aqyrynda bıletterdi satý toqtatyldy.

– Biz aldyn ala @ticketonkz ınfraqurylymyn kúsheıtip, serverlerdi úsh ese arttyrdyq. Bul rette aldyńǵy eń joǵary suranys deńgeıine súıendik (buǵan deıingi rekord – Korjdyń kontsertine shamamen 13 500 bılet 1,5 saǵat ishinde satylyp ketken bolatyn). Alaıda qyzyǵýshylyqtyń shynaıy aýqymyn esepteı almadyq. Saıt isten shyqqan kezde, tehnıkalyq top Cloudflare kompanııasynyń júkteme ınfraqurylymyna arnalǵan elektrondy kezek júıesin shuǵyl engizdi. Biraq asyǵys jaǵdaıda keıbir mańyzdy jaıttar eskerýsiz qalyp, nátıjesinde kóptegen tapsyrys brondalyp, bıletterdiń qaıtalanýy qaýpi týyndady. Biz bul qaýipti baıqaǵan soń, satýdy toqtatyp, túni boıy qolmen dýblıkattardy anyqtap, alypsatarlardy anyqtap, ár klıentke jeke sheshim izdeýmen aınalystyq, - dep jazdy ol Threads paraqshasynda.

Túnge qaraı kompanııa durys rásimdelgen satyp alýlar boıynsha vaýcherlerdi jiberýdi bastady. Qazir serverdiń tehnıkalyq qyzmeti táýlik boıy jumys istep jatyr.

– Qolynda vaýcheri bar klıentter ýaıymdamasa bolady. Búgin biz barlyq tekseristi aıaqtap, qalǵan klıentterge vaýcherlerdi jiberýdi bastaımyz, - dedi Alekseı Lı.

Kompanııa jaǵdaıdy ádiletti túrde sheshý úshin mynadaı qadamdar jasap jatyr:

Birinshiden, barlyq satyp alýshyǵa bılet sanatyna qaramastan Ticketon komıssııasyn tolyq qaıtarady;

Ekinshiden, tapsyrysy basqa kórermenderdiń tapsyrysymen qaıtalanýy múmkin bolǵan klıenttermen jeke jumys júrgizilip jatyr. Eki stsenarıı boıynsha áreket etip jatyr.

Kópshiligine apgreıd jasaıdy: bıletterdiń sanatyn joǵary deńgeıge aýystyrady. Az bóligine, eger bılet sanaty tómendetilse, bılet qunyn tolyq qaıtarady jáne olar kontsertke tegin bara alady (júzdegen adam).

Sonymen qatar Alekseı Lı byltyr Ticketon servısiniń jańa nusqasyn jasap bastaǵandaryn aıtyp ótti. Bastapqyda ony kúzde iske qosýdy josparlaǵan, alaıda sońǵy jaǵdaıǵa baılanysty jańa júıeni jaqynda iske qosý josparlanyp otyr.

– Men barshadan keshirim suraımyn. Mundaı tájirıbeni kitaptan oqyp úırený múmkin emes, mundaı jaǵdaı Qazaqstandaǵy birde-bir bılet satý servısiniń basynan ótpegen. Biz bul qatelikten sabaq alyp, myqty bola túsemiz. Qazaqstanda álemdik deńgeıdegi otandyq servıs bolady. Barshańyzǵa shydamdylyq pen qoldaý úshin raqmet, - dep jazdy Alekseı Lı.

Aıta keteıik, bıyl 1 tamyzda álemge tanymal pop-juldyz Djennıfer Lopes Astanada kontsert beredi.

Keıin áleýmettik jelide Djeı Lonyń kontsertine Qazaqstanǵa týrlar satylyp jatqany aıtyldy. 

Artynsha uıymdastyrýshylar deldal satqan bıletpen Djeı Lo kontsertine kire almaıtynyn jáne zańsyz satýǵa qatysty tekserý jumystary bastalǵanyn málimdedi.