Djenerıkterdi paıdalaný máselesi keńinen talqylanady - mınıstrlik
ASTANA. QazAqparat - Qazaqstanda dári-dármekterdiń túpnusqasynan góri djenerıkter, ıaǵnı sol dárilerdiń kóshirmesi basym. Tipti, memlekettik satyp alýlar arqyly ondaı dáriler kóptep alynady. Onyń quramy túpnusqamen birdeı bolsa da, xalyq arasynda djenerıkterdiń sapasyna qatysty alańdaýshylyq bar. Osyǵan baılanysty QR Densaýlyq saqtaý mınıstrligi atalǵan máseleni keńinen talqylaýdy josparlap otyr, dep xabarlaıdy QazAqparat tilshisi.
«Iá, kúni keshe áleýmettik jelilerde de atalǵan másele qyzý talqylandy. Memlekettik satyp alýlar kezinde djenerıktiń satyp alynǵany ras. Sebebi baǵasy tómen boldy. Degenmen, dárigerler men patsıentterdiń alańdaýshylyǵyn eskere otyryp, biz aldaǵy juma kúni arnaıy «dóńgelek ústel» uıymdastyryp, osy máseleni keńinen talqylaýdy kózdep otyrmyz. Sonyń nátıjesi boıynsha sheshim qabyldanady», - dedi QR Densaýlyq saqtaý vıtse-mınıstri Lázzat Aqtaeva Astanada ótken baspasóz máslıxatynda.
Vıtse-mınıstrdiń aıtýynsha, djenerıkterdi satyp alǵanda qarajat únemdeledi. Alaıda aqshanyń únemdelgeni medıtsınalyq qyzmettiń sapasyna keri áserin tıgizbeýi tıis. Sol sebepti kásibı sarapshylardyń qorytyndysy qajet.
Aıta keteıik, djenerıkter - bul qoldan jasalǵan dári emes. Onyń túpnusqadan esh aıyrmashylyǵy bolmaýy da múmkin. Ataýy ǵana ózgeshe, al quramy birdeı. Baǵasy áldeqaıda arzan. Sebebi túpnusqany jasap shyǵarǵanda klınıkalyq zertteýler jáne taǵy basqa sharalarǵa kóp aqsha ketedi. Sodan baǵasy da qymbat. Al djenerıkter sol túpnusqanyń quramy boıynsha jasalady. Búginde bir dári-dármektiń ondaǵan kóshirmesi bolady. Máselen, «Dıklofenak» preparatynyń Voltaren, Ortofen, Feloran, Dıplonat P jáne taǵy basqa birneshe ataýy, ıaǵnı djenerıkteri bar. Ondaı kóshirmeler tabletka, gel, maz bolyp shyǵarylsa da, quramy bir, emdeıtin aýrýy da bir.
