Djekı Channyń sapary qarsańynda Almatyda qaýipsizdik kúsheıtildi
ASTANA. KAZINFORM — Djekı Channyń Almatyǵa kelýine oraı qalada qaýipsizdik máselesi talqylandy, dep habarlaıdy Polisia.kz.
Álemge áıgili akter, rejısser ári prodıýser Djekı Channyń Almatyǵa kelýi qarsańynda Almaty qalasy polıtsııa departamentinde halyqaralyq kınojobany júzege asyrý kezeńinde qoǵamdyq qaýipsizdik pen qoǵamdyq tártipti qamtamasyz etý máselelerine arnalǵan keńeıtilgen jumys keńesi ótti.
Jıynǵa qoǵamdyq qaýipsizdikti qamtamasyz etýge, jol qozǵalysyn uıymdastyrýǵa, is-sharalardy súıemeldeýge jáne túsirilimdi uıymdastyrýshylarmen ózara is-qımyldy úılestirýge jaýapty qyzmetter men bólimshelerdiń basshylary qatysty.
Almaty qalasy polıtsııa departamentiniń bastyǵy Aıdyn Qabduldınov álemdik deńgeıdegi kınojobanyń Almatyda túsirilýi qala úshin ǵana emes, tutas Qazaqstan úshin de mańyzdy oqıǵa ekenin atap ótti. Onyń aıtýynsha, mundaı aýqymdy jobalardyń qaýipsizdigin qamtamasyz etý quqyq qorǵaý organdarynyń joǵary kásibı deńgeıde ári úılesimdi jumys isteýin talap etedi.
— Bizdiń basty mindetimiz — qoǵamdyq qaýipsizdiktiń joǵary deńgeıin qamtamasyz etý, qoǵamdyq tártipti senimdi qorǵaý jáne túsirilim jumystarynyń kedergisiz ótýine barlyq qajetti jaǵdaıdy jasaý. Mundaı jobalar Qazaqstannyń halyqaralyq bedelin nyǵaıtýǵa yqpal etedi. Sondyqtan árbir qyzmet kásibı, úılesimdi ári zań talaptaryn qatań saqtaı otyryp áreket etýi tıis, — dedi Aıdyn Qabduldınov.
Keńes barysynda túsirilim alańdaryndaǵy qaýipsizdikti qamtamasyz etý, joba qatysýshylaryn súıemeldeý, jol qozǵalysyn uıymdastyrý, jergilikti atqarýshy organdarmen jáne túsirilimdi uıymdastyrýshylarmen ózara is-qımyldy úılestirý, sondaı-aq yqtımal tótenshe jaǵdaılar týyndaǵan jaǵdaıda áreket etý algorıtmderi jan-jaqty pysyqtaldy.
Polıtsııa departamenti bastyǵynyń tapsyrmasyna sáıkes kúshter men quraldardy jumyldyrý tártibi, vedomstvoaralyq ózara is-qımyl tetikteri, sondaı-aq qoǵamdyq tártipti qamtamasyz etýge baǵyttalǵan profılaktıkalyq jáne uıymdastyrýshylyq is-sharalar kesheni aldyn ala aıqyndaldy.
Eske salsaq, Mańǵystaý oblysynda álemge áıgili akter Djekı Channyń qatysýymen túsiriletin «Dospehı Boga 4: Ýltımatým» halyqaralyq kıno jobasynyń túsirilimi bastalǵany habarlandy.
Buǵan deıin Aıda Balaeva Djekı Chandy Qazaqstandaǵy túsirilimniń bastalýymen quttyqtaǵanyn jazǵanbyz.
