Djekı Channyń qatysýymen Mańǵystaýda fılm túsiriledi
AQTAÝ. KAZINFORM – Álemdik kıno juldyzy Djekı Chan jáne «Qudiretti saýyt: Ýltımatým» fılminiń rejısseri Robert Kýn jańa iri kınojobanyń negizgi túsirilim alańy retinde Mańǵystaýdy resmı túrde bekitti. Bul týraly Mańǵystaý oblysynyń Qoǵamdyq kommýnıkatsııa ortalyǵy habarlady.
Sapar barysynda kınojoba ókilderi óńirdiń tabıǵı jáne ınfraqurylymdyq múmkindikterimen tanysyp, ondaǵan yqtımal túsirilim alańdaryn aralap, negizgi tabıǵı nysandardy jan-jaqty zerdelegen. Uzaq kelissóz nátıjesinde biregeı landshafttary, aýqymdy panoramalary jáne tabıǵı ereksheligi úshin «Qudiretti saýyt» fılminiń túsirilim orny retinde dál Mańǵystaý tańdaldy.
- Kýltke aınalǵan fılmniń Mańǵystaýda túsirilýi Qazaqstannyń kınoındýstrııasy úshin mańyzdy oqıǵa retinde baǵalanyp otyr. Jobanyń júzege asyrylýy elimizdiń halyqaralyq kınematografııalyq keńistiktegi ornyn nyǵaıtyp, óńirge ınvestıtsııalar tartýǵa, sondaı-aq kreatıvti ındýstrııalar men týrızm áleýetin damytýǵa yqpal etedi. Atalǵan jobaǵa osyndaı deńgeıdegi halyqaralyq komandanyń qatysýy kásibı tájirıbe almasýǵa, jergilikti mamandardy tartýǵa jáne Mańǵystaýdyń tabıǵı ári mádenı murasyn álemdik aýdıtorııaǵa keńinen tanytýǵa qosymsha múmkindikter ashady, - delingen habarlamada.
Joba boıynsha daıyndyq jáne uıymdastyrý jumystary belgilengen tártipke sáıkes jalǵasatyn bolady.
Buǵan deıin Djekı Channyń «Qudiretti saýyt» fılminiń jalǵasy Mańǵystaýda túsirilýi múmkin ekenin jazǵan bolatynbyz.
Djekı Chan Qazaqstanda túsiriletin fılmniń rejısserin bekitti.