Djekı Chandy anasy 25 dollarǵa satyp jibermek bolǵan
ASTANA. QazAqparat - Djekı Chandy búgingi tańda bilmeıtin adam joq shyǵar. Ol komedııalyq atys-shabys janryndaǵy fılmderi arqyly kópshiliktiń oıynda «jaqsy motıvti keıipker» retinde qalǵan. Kez kelgen er azamat bala kezinde oǵan uqsap judyryqtasqysy da kelgen bolar. Endeshe belgili akterdiń ómirinen kóbimiz bile bilmeıtin qyzyqty derekterdi usynamyz.
1. Djekı Chan týylmaı jatyp-aq bárin tań qaldyrǵan. Akterdiń anasy 12 aı bala kóterip, akterdi dúnıege alyp keledi. Onyń týylǵan kezdegi salmaǵy - 5,5 keli. Ata-anasy alyp balasyna qarap, oǵan Pao Pao (Zeńbirek oǵy) dep laqap at qoıady.
2. Djekı Chan kedeı otbasynda dúnıege kelgen. Ol týǵan kezde áke-sheshesi aqshadan qysylyp júrgen bolatyn. Muny biletin akýsher olarǵa tıimdi usynys aıtady. Ol Gonkongtaǵy balasy joq aǵylshyn dárigerleriniń bala satyp alǵysy keletinin túsindiredi. Chan otbasy balasyn 25 AQSh dollaryna satýǵa kelisimin beredi. Biraq keıinnen Djekı Channyń bıologııalyq ata-anasy mundaı tıimdi kelisimnen bas tartady.
3. Djekı Chan - akter ári shyǵys jekpe-jeginiń sheberi. Al onyń án salatyn ónerin birimiz bilsek, endi birimiz odan beıhabarmyz. Djekı Chan 6 jasqa tolǵan kezde, anasy ony Beıjiń opera mektebine oqýǵa beredi. Djekı bul mektepte vokalmen aınalysady. Mektepti támamdaǵannan keıin tabysty mamanǵa aınalǵysy kelip, kaskader bolyp jumys isteıdi. Ol kezde fılmdegi kúrdeli epızodtardy oryndaǵany úshin qomaqty qarjy tólenetin bolǵan. Sodan keıin, kıno óndirisine qyzyǵýshylyǵy oıanyp, akterlik qabiletin shyńdaý úshin ártúrli fılmderdiń ekinshi dárejeli rólderi men epızodtaryna túsedi. Búkil álemge tanymal akter atanǵannan keıin ǵana qaıtadan vokalmen aınalysýdy jón kóredi. Nátıjesinde Djekı Chan búginge deıin 100-den astam án jazyp, 20 albomyn jarııalap úlgerdi. Olardyń basym bóligi ózi túsken fılmderdiń saýdtregine aınalǵan.
4. 1970 jyldary Djekı Chan bir kózin plastıkalyq ota jasaý arqyly úlkeıtedi. «Maskúnem sheber» atty fılmniń túsirilimi kezinde belgili akterdiń bir kózine zaqym tıedi. Djekı Channyń kózine ota jasaýǵa týra keledi. Nátıjesinde zaqymdanǵan kózi ekinshisinen birshama úlkendeý bolyp qalady. Djekı Chan betiniń sımmetrııasyn saqtaý úshin plastıkalyq ota jasaýshy dárigerlerge júginedi. Hırýrgtar onyń saý kózin úlkeıtip, akter betiniń proportsııasyn burynǵy qalpyna keltiredi.
5. Djekı Chan tórt ret Gınness rekordtar kitabyna engen. Rekordtyń bireýin jetistik dep aıtý qıyn. «Aıdahar lordy» atty komedııalyq fılmniń sıýjeti boıynsha master Chan qytaı fýtboly matchyna qatysýy tıis bolǵan (Qytaı fýtboly biz biletin fýtboldan áldeqaıda ózgeshe qurylym men erejege ıe). Stsenarıı boıynsha, akter alty metrden kishkene qaqpaǵa qytaı dobyn kirgizýi qajet edi. Osy epızodty túsirý úshin 1600 dýbl men eki kún ýaqyt ketken eken. Bul bir sheberlik ádisin oryndaýǵa ketken eń kóp ýaqyt bolǵandyqtan, Djekı Chan esimi Gınness rekordtar kitabyna enedi.
6. Djekı Chan MTV Movie Awards syılyǵyn kezdeısoq ıelenedi. 1995 jyly atalǵan syılyqty tabystaýǵa belgili amerıkalyq rejısser Kventın Tarantıno shaqyrylady. Kventın óz kezeginde kelisimin berý úshin eki talabyn oryndaýdy suraıdy. Ol Djekı Chandy syılyqqa laıyq dep tabýlaryn aıtyp, sol syılyqty ózi tabystaǵysy keletinin málimdeıdi. Іs-sharany uıymdastyrýshylar qarsy bolmaıdy. Nátıjesinde Tarantıno óziniń bala kezindegi súıikti qaharmanyna syılyqty óz qolymen usynady.
7. Djekı Chan óz mansabynda 3 myńnan astam dene jaraqatyn alǵan, aıaq, qol, tipti qabyrǵa súıekteri synady. Nátıjesinde búkil álemniń saqtandyrý kompanııalary Chan komandasymen kelisimge kelýden bas tartady. Ony qara tizimge engizedi, dep jazady massaget.kz.
