Djekı Chan tartý etken kitap Elbasy kitaphanasyna kelip tústi
NUR-SULTAN. QazAqparat - Áıgili kınojuldyz Djekı Chan tartý etken kitap Elbasy kitaphanasyna kelip tústi, dep habarlaıdy QazAqparat «Qazaqstan Respýblıkasynyń Tuńǵysh Prezıdenti - Elbasynyń kitaphanasy» memlekettik mekemesine silteme jasap.
«Aǵymdaǵy jyldyń 28 sáýirinde Qazaqstan Respýblıkasynyń Tuńǵysh Prezıdenti N.Á. Nazarbaev Qytaıǵa sapary barysynda belgili akter Djekı Chanmen júzdesti. Kezdesýge Qytaı akteriniń áriptesteri men shyǵarmashylyq ujymy qatysty. Elbasy álemge áıgili tulǵamen kezdesý sátiniń túskenine rızashylyǵyn bildirip, Qazaqstan men Qytaı memleketteri arasyndaǵy qarym-qatynastyń mańyzdylyǵyn atap ótti. Osy tusta Djekı Chan qos memleket arasyndaǵy mádenı yntymaqtastyqqa kórsetip jatqan Elbasynyń qoldaýy úshin zor alǵysyn aıtyp, N.Á. Nazarbaevqa «Men baqyttymyn» kitabyn tartý etti»ǵ-delingen habarlamada.
Búginde Qytaı akteriniń qoltańbasy bar kitap Elbasy kitaphanasynyń qoryna kelip tústi. Alty bólimnen quralǵan tartýlyq basylym Djekı Channyń ómiri men óner salasyndaǵy jolynan syr shertedi. Kózi tirisinde esimi ańyzǵa aınalǵan tulǵanyń ómirlik kózqarastary men ustanymdaryn, ulttyq mádenı mura men adamı qundylyqtarǵa adaldyǵyn, eńbekqorlyǵy men qarapaıymdylyǵyn, erligi men bastan ótken oqıǵalaryn kitap betine akterdiń áriptes dosy Chjý Mo túsirgen.
«Adamdardyń taǵdyrlaryn qosatyn bul ómir tosynsyılarǵa baı. Atalmysh kitaptyń jazylyp, basylymnan shyǵýy úsh jyldaı ýaqytty talap etti. Bul ýaqyttyń ishinde baqytqa da, sátsizdikke de toly sátterdi bastan ótkerip úlgerdim. Ótkenge kóz júgirtsem, estelikterimmen dál qazir bóliskenim abzal sııaqty. Áńgimelerim oqyrmandarǵa qyzyq bolady degen úmittemin. Olar kem degende naǵyz bolmysymdy tanyp-túsinýge, qorytyndy oı túrtýge kómektesýi tıis», - dep Djekı Chan kitap alǵysózinde pikir bólisedi.
«Men baqyttymyn» kitaby Djekı Channyń shynaıy ári ashyq áńgimelerine negizdelgen. Basylym betterin paraqtaǵan oqyrman túsirilim alańdarynda bolǵan qyzyqty jaǵdaılardy oqyp qana qoımaı, akterdyń abyroıly tulǵa retinde qalaı qalyptasqanyn, qandaı qıyndyqtardan ótkenin bile alady. Qarapaıym tilmen jazylǵan ol Djekı Channyń ata-anasyna, jubaıy men ulyna, áriptesteri men dostaryna degen qarym-qatynasyn baıandap, akterdiń qýanyshyn, keıde ókinishi men muńyn keltiredi, kez kelgen adamnyń qatelik keltirýge beıim ekenin túsindirip, baqytty bolýdyń «syryn» úıretedi.
