Djekı Chan Olımpıada alaýyn alyp ótti
ASTANA.KAZINFORM — Áıgili akter Mılan men Kortınada bastalyp jatqan qysqy Olımpıada oıyndarynyń estafetasyna qatysty, dep habarlaıdy Kazinform agenttigi.
Djekı Chan Olımpıada qozǵalysy jaqtaýshylarynyń biri. Bul onyń Olımpıada alaýynyń estafetasyna úshinshi ret qatysýy. Akter alaýdy 2008 jáne 2022 jyldardaǵy Beıjiń oıyndarynda, sondaı-aq 2024 jyly Parıjde ótken jazǵy Olımpıada oıyndarynda alyp júrdi.
— Men úshin qaıtadan alaý ustaýshy bolý úlken qurmet. Men Olımpıada alaýyn alyp júrgen saıyn bul jaı ǵana alaý emes, bul sport pen adamzat rýhy ekenin sezinemin. Jaı ǵana ot emes, beıbitshilik pen mahabbatty alyp júrgendeı bolasyń, — dedi ol.
Aktermen birge semserlesýshi Sandro Kýomo, júzýshi Immakolata Cherasýolo jáne alaý ustaýshy Marııa Marınella Bıakka ejelgi Rım qalasynda olımpıada alaýyn alyp júrdi.
BusinessMirror málimeti boıynsha, estafeta Italııanyń barlyq 110 provıntsııasy arqyly ótedi jáne jalpy uzyndyǵy 12 000 km. Máre syzyǵy 2026 jylǵy Qysqy Olımpıada oıyndarynyń ashylý saltanaty 6 aqpanda ótetin Mılandaǵy San-Sıro stadıonynda bolady.
Aıta keteıik, Mılan-Kortına 2026 jylǵy Qysqy Olımpıada oıyndarynyń alaýyn jaǵý rásimi 5 jeltoqsanda Rımde ótti.
Sondaı-aq, biz Rımdegi Stadio dei Marmi stadıonynda bastalǵan Olımpıada alaýynyń estafetasy týraly habarlaǵan bolatynbyz.
Buǵan deıin tanymal akter jáne rejısser Djekı Chan basty róldi somdaıtyn «Qudiretti saýyt» fılminiń tórtinshi bóliminiń túsirilimi Qazaqstanda ótetini habarlanǵan.