Djekı Chan Qazaqstanda: Mańǵystaýda «Dospehı Boga 4: Ýltımatým» fılminiń túsirilimi bastaldy
AQTAÝ.KAZINFORM - Mańǵystaý oblysynda álemge áıgili akter Djekı Channyń qatysýymen túsiriletin «Dospehı Boga 4: Ýltımatým» halyqaralyq kıno jobasynyń túsirilimi bastaldy. Jobany Sálem Entertainment jáne Dala Edge Creative Tech Park kompanııalary júzege asyryp jatyr, dep habarlaıy Mańǵystaý oblysynyń ákimdigi.
Qazirgi tańda túsirilim toby Mańǵystaýdyń biregeı tabıǵı landshafttarynda alǵashqy kadrlardy taspaǵa túsirip jatyr. Fılmniń negizgi túsirilim alańdarynyń biri retinde álemge tanymal Bozjyra shatqaly tańdalǵan. 7-12 maýsym aralyǵynda atalǵan aýmaqta 35 adamnan turatyn túsirilim toby jumys júrgizip, fılmniń birqatar kórinisterin túsirdi.
Mańǵystaý oblysynyń ákimi Nurdáýlet Qılybaı shyǵarmashylyq top ókilderimen kezdesip, halyqaralyq aýqymdaǵy kınojobany júzege asyrýǵa jan-jaqty qoldaý bildirdi. Kezdesý barysynda óńirde kreatıvti ındýstrııany damytý, kıno jáne televızııalyq jobalardy óndirý, jastarǵa arnalǵan sapaly medıakontent qalyptastyrý, sondaı-aq Mańǵystaýdyń týrıstik jáne mádenı áleýetin halyqaralyq deńgeıde nasıhattaý máseleleri talqylandy.
– Mańǵystaý kınoındýstrııa salasyndaǵy aýqymdy jobalardy júzege asyrýǵa qolaıly óńir. Biz kreatıvti ekonomıkany damytýǵa, mádenı murany nasıhattaýǵa jáne óńirdiń týrıstik tartymdylyǵyn arttyrýǵa baǵyttalǵan bastamalarǵa jan-jaqty qoldaý kórsetýge daıynbyz. Mundaı jobalar Mańǵystaýdy halyqaralyq deńgeıde tanytyp, óńirdiń áleýetin keńinen kórsetýge múmkindik beredi, – dedi oblys ákimi Nurdáýlet Qılybaı.
Atalǵan joba otandyq kınoındýstrııa úshin mańyzdy oqıǵa sanalady. Ol ishki týrızmdi halyqaralyq deńgeıde ilgeriletýge jańa múmkindikter ashady. Óńirdiń biregeı tabıǵı jáne tarıhı nysandarynyń halyqaralyq kıno jobada kórinis tabýy mıllıondaǵan kórermenniń nazaryn aýdaryp, týrızmniń damýyna, ınvestıtsııalyq tartymdylyqtyń artýyna jáne óńir men elimizdiń halyqaralyq bedeliniń nyǵaıýyna yqpal etedi.
Túsirilim jumystary bıyl aıaqtalady dep josparlanýda, al fılmniń prokatqa shyǵýy 2027 jyldyń aqpan aıyna belgilengen.
Osyǵan deıin Djekı Channyń qatysýymen Mańǵystaýda fılm túsiriletini týraly jazdyq.
