Djekı Chan Qazaqstanda fılm túsirý máselesin taǵy qozǵady
ASTANA. QazAqparat - Álemge áıgili akter Djekı Chan bizdiń elimizde kıno túsirý týraly ýádesin umytpaı, osy týrasynda óz oıyn bildirgen. Bul týraly «Qazaqstan» RTRK» AQ Basqarmasynyń tóraǵasy Erlan Qarın «Instagramdaǵy» paraqshasynda jazdy, dep habarlaıdy «QazAqparat» HAA tilshisi.
Qytaı elinde Erlan Qarın Djekı Chanmen kezdesip, osy suraq týrasyna áńgime órbitken.
«Astanaǵa jasaǵan saparynan keıin Djekı fılmderiniń birin Qazaqstanda túsirý týraly óz ıdeıasyna tipti qyzyǵa tústi. Tipti bul týrasynda bir oıyn da aıtyp qaldy. Buǵan qosa bizdiń elden alǵan áserimen taǵy bólisti. Astananyń kórkine tamsanǵanyn, qazaqstandyqtardyń qonaqjaılyǵyna tánti bolǵanyn aıtty», - dep jazdy Erlan Qarın.
Eske sala ketsek, osy jyldyń shilde aıynda Djekı Chan Astanaǵa kelip, qytaı kınolarynyń festıvaline qatysqan bolatyn. Dál osy saparynda akter Qazaqstanda fılm túsirgisi keletinin bildirgen.
