Djekı Chan Qazaqstanda fılm túsirmek
ASTANA. QazAqparat - Djekı Chan Qazaqstanda fılm túsirýdi armandap júr, dep habarlaıdy QazAqparat.
«Shynyn aıtqanda, osyǵan deıin Qazaqstanǵa kelip, kınematografııamen aınalysýdy armandaǵan edim. Alaıda ýaqyttyń tapshylyǵynan, búginge deıin bul armanymdy júzege asyra almadym. Bolashaqta Qazaqstanǵa mindetti túrde kelip, osy saladaǵy eńbegimdi iske asyrmaq oıdamyn», - deıdi Djekı Chan búgin Astanadaǵy baspasóz máslıhaty barysynda.
Budan bólek ol tilshiler saýalyna jaýap berý kezinde jetistikke qalaı jetkenin aıtyp berdi.
«Árıne, men birden óner juldyzy atanǵan joqpyn, qazirgi deńgeıime birtindep keldim. ıAǵnı eń tómennen ár qadam saıyn joǵarylaı berdim. Sondyqtan da árbir adamnyń jaǵdaıyn jaqsy túsinemin, sáıkesinshe ár adamnyń jumysyna qurmetpen qaraımyn», - dep toqtaldy tanymal óner juldyzy.
Osy oraıda ol tabysqa eń bastysy kúsh-jiger men jankúıerlerdiń qoldaýy arqasynda, sondaı-aq únemi janynan tabylatyn komandasynyń kómegimen jetkenin aıtty.
«Álem elderinde jankúıerlerim meniń fılmderimdi tamashalap júrgenin bilemin. Osy rette týyndylarym arqyly óz álemimdi tanystyrýǵa tyrysyp kelemin. Atap aıtqanda, meniń fılmderimde tildik kedergiler bolmaǵandyqtan, olardyń barlyǵynyń maǵynasyn esh qıyndyqsyz túsine alasyzdar», - dedi ol.
Eske sala keteıik, álemdik akter, kaskader, kınorejısser, kınoprodıýser, stsenarıst, ánshi, mıllıondaǵan kórermenniń súıiktisine aınalǵan ańyz adam - Djekı Chan keshe alǵash ret Astanaǵa aıaq basty. Sharanyń basty uıymdastyrýshylary - «Qazaqstan» respýblıkalyq teleradıokorporatsııasy men QHR Baspasóz, baspa, radıo, kıno jáne televızııa isi jónindegi memlekettik basqarmasy.
