Djek MakKaferı: Qanat Islam rıngte Golovkın tárizdi bolýy kerek
ASTANA. QazAqparat - Qanat Islam rıngte Golovkın sııaqty bolýy kerek. Sonda ǵana ol chempıon bolady, degen pikir bildirdi amerıkalyq jýrnalıst.
Amerıkanyń Delcotimes.com saıtynyń jýrnalısi Djek MakKaferı suhbatynda qazaqstandyq kásipqoı boksshy Qanat Islamdy (23-0, 19 KO) WBA (Super), IBO, WBC jáne IBF tujyrymdary boıynsha orta salmaqtaǵy álem chempıony otandasy Gennadıı Golovkınmen (36-0, 33 KO) salystyrdy, dep habarlaıdy dodasport.kz.
«Men Qanat Islamnyń sońǵy jekpe-jegin kórdim. Ol maǵan áser qaldyrdy. Qoly jyldam qımyldaıdy. Islam chempıon bolady», - dedi MakKaferı suhbatynda.
Sondaı-aq, amerıkalyq jýrnalıst meksıkalyq «Kanelo» men qazaqstandyq Qanat Islamnyń kezdesýin kórgisi keletinin aıtyp ótti.
«Islam bireýmen básekege túse alatyn daryndy boksshy. Onyń múmkindigi bar. Jáne qazaqstandyq boksshy sońyna deıin judyryqtasatyn bolady», - dedi MakKaferı.
Sonymen qatar, ol Qanat Islam men Gennadıı Golovkındi salystyryp jatqandarǵa qatysty pikir bildirdi. «Iá, qazaqstandyq boksshylardyń bir ereksheligi bar - olar qarsylastarynan qoryqpaıdy. Sońǵy jekpe-jekte Islam GGG sııaqty dórekileý boldy. Ol osy qalpynda jalǵastyra berse, chempıon bolýy ábden múmkin», - dedi amerıkalyq jýrnalıst.
