Djek Ma: Nazarbaev bizdiń urpaqtyń kýmıri ári asa kórnekti kóshbasshy
«Prezıdenttiń G20 aıasyndaǵy tyǵyz kestesine qaramastan bizben kezdesý úshin ýaqyt bólgenine tań-tamasha boldym. Menińshe, bul Qazaqstannyń shaǵyn jáne orta bıznesi, jastary jáne tolyqtaı alǵanda sizderdiń elderińizdiń ekonomıkasy úshin qyzyqty ári mańyzdy bolmaq. Biz logıstıka salasyndaǵy, sonymen birge shaǵyn jáne orta bıznes, jastar úshin qarjylyq jaǵdaıdy jetildirý boıynsha yntymaqtastyq áleýetin talqyladyq», - dedi ol Qazaqstan Prezıdenti Nursultan Nazarbaevpen kezdesýinen keıin.
«Sizderdiń Prezıdentterińiz, - dep jalǵady sózin ol, óz elin birneshe jyl alǵa qaraı ilgeriletip, memleketti jańǵyrtýmen qatar jaqsy ómirge jetelep kele jatqan asa kórnekti kóshbasshy».
«Qazaqstandaǵy konferentsııaǵa qatysqan kezimde eshteńe joq jerden jańa astana salýǵa nebári 17 jyl ýaqyt ketkenin estigende zor tańdanysta boldym. Ol sulý da zamanaýı qala. Men tipti álemniń qandaı da bir bóliginde nebári 17 jyldyń ishinde osyndaı qala salýǵa bolady degendi kóz aldyma elestete de almas edim. «Alibaba» kompanııasyna da qurylǵanynan osy ýaqytqa deıin 17 jyl ótti. Meniń oıymsha, kompanııa qurý ońaı is emes. Biraq, mundaı qala salyp, eldi gúldendirý odan da qıyn ekendigi sózsiz», - dep atap ótti Djek Ma.
Sonymen qatar qytaılyq kásipker óz tabysynyń qupııasymen de bólisti.
«Eger sen tabysty bolǵyń kelse, onda ózińniń jáne ózgelerdiń bolashaǵyna jaýapkershilikpen qara. Saǵan kóp jumys isteý qajet, ózgelerdi túsinip, olardy qýattandyryp otyrýǵa tıissiń. Men Qazaqstan basshysynyń yjdahatty jumysyna tań qaldym. Qazaqstan Premer-Mınıstrimen de jaqsy qarym-qatynastamyn. Al búgin Prezıdentpen kezdesý mártebesi buıyrdy. Men Qazaqstan úshin bir nárse júzege asyrý múmkinshiligin alǵanyma rızamyn. Biz qazaqstandyq jastardyń basym bóligimen jumys isteı alatyn bolamyz dep úmittenemin», - dep atap ótti ol.