Djeff Bezos Amazon aktsııalarynyń quldyraýyna baılanysty Forbes reıtınginde tómendedi
ASTANA. KAZINFORM — Amazon-nyń negizin qalaýshy Djeff Bezos kompanııa aktsııalary baǵasynyń kúrt quldyraýyna baılanysty álemniń eń baı adamdary tiziminde birneshe orynǵa tómendedi, dep habarlaıdy BILD.
Nıý-Iork qor bırjasynda Amazon aktsııalary paıda týraly boljam men shyǵyndardyń aıtarlyqtaı ósýi týraly málimdemeler jarııalanǵannan keıin 9%-dan astamǵa arzandady.
Forbes jýrnaly atap ótkendeı, Bezostyń baılyǵy bir kúnde 16 mıllıard dollarǵa tómendep, 218,9 mıllıard dollar boldy. Kompanııanyń toqsan saıynǵy qarjylyq nátıjeleri men Amazon-nyń 2026 jylǵa arnalǵan josparlary ınvestorlardyń kóńilin qaldyrdy. Aktsııaǵa shaqqandaǵy paıda 1,95 dollardy qurap, bul naryq kútken baǵadan tómen boldy.
Sonymen qatar, kompanııanyń kelesi jyly shamamen 200 mıllıard dollar ınvestıtsııalaý jospary naryqqa qatysýshylar arasynda alańdaýshylyq týdyrdy. Osynyń aıasynda Amazon aktsııalaryna saýda ashylǵannan keıin kóp uzamaı bir aktsııaǵa shamamen 202 dollarǵa deıin tómendedi.
Sarapshylar aktsııalardyń satylýy negizinen jasandy ıntellekt tehnologııalaryn damytý shyǵyndarynyń ósýine baılanysty ekenin atap ótti.
Aktsııa baǵasynyń quldyraýy Bezostyń mıllıarderler reıtıngindegi jaǵdaıyna tikeleı áser etti. Ony Forbes baılyǵyn 226,6 mıllıard dollarǵa baǵalaǵan Meta bas dırektory Mark Tsýkerberg basyp ozdy. Nátıjesinde Bezos besinshi orynǵa tómendedi, al Ilon Mask áli de birinshi orynda.
Buǵan deıin Amazon-nyń ondaǵan myń qyzmetkeri jumyssyz qalýy múmkin ekeni týraly jazdyq.
Byltyr qazan aıynda kompanııa 30 myń qyzmetkerin qysqartatyny belgili boldy.