«Djaz Bend Almaty» orkestri tuńǵysh ret «Nıý-Iork djaz-sıtı» festıvalinde óner kórsetedi
ALMATY. QazAqparat - Qazaqstandyq «Djaz Bend Almaty» orkestri tuńǵysh ret «Nıý-Iork djaz-sıtı» festıvalinde óner kórsetedi. Bul jóninde búgin Almatyda «XIII Halyqaralyq Djaz merekesi» festıvaliniń ashylýyna qatysty ótken baspasóz máslıhatynda osy orkestrdiń negizin qalaýshy jáne jetekshisi Tagır Zarıpov málimdedi.
Onyń aıtýynsha, «Djaz Bend Almaty» - bıylǵy Nıý-Iork djaz festıvaline shaqyrylyp otyrǵan jalǵyz shet eldik orkestr bolmaq.
«Qudaı qalasa, jolǵa 11 sáýir kúni shyǵamyz. Al 13 sáýir kúni kontsert qoıamyz. Estýimizshe, bıletter tolyǵymen satylyp ketken. Bul festıval tórt kúnge sozylady», - dedi atalmysh orkestrdiń negizin qalaýshy jáne jetekshisi Tagır Zarıpov.
Esterińizge sala keteıik, Tagır Zarıpov Almatydaǵy «XIII Halyqaralyq Djaz merekesi» festıvaliniń ǵana emes, búkil Ortalyq Azııa boıynsha jalǵyz djaz mektebiniń negizin qalaýshy. Mektep Almaty qalasynda 2000 jyly ashylǵan. Búgingi tańda bul mýzyka ordasynda 190 oqýshy bilim alyp jatyr. Onda djazdyq solfedjıo, djaz tarıhynan pánder ótiledi. Oqý merzimi - mýzykalyq aspaptardyń kúrdeligine baılanysty 5-7 jyl.
«Búgin Almatyda osymen 13 ret ótkizilip otyrǵan «Halyqaralyq Djaz merekesi» festıvalinde shet elden kelgen óner maıtalmandary bizdiń mektepte tegin sheberlik synyptaryn ótkizetin bolady. Taǵy bir aıta keteıin degenim, 13 jyl ishinde bizdiń festıvalde 300-den astam sheteldik mýzykant óner kórsetipti. Jas mýzykanttardy tárbıeleýde festıvaldiń alatyn orny zor», - dedi Tagır Zarıpov.
Atalmysh festıvalge Almaty ákimdigi men birqatar shet eldik elshilikter jan-jaqty qarjylyq qoldaý kórsetip keledi. Bıylǵy merekege Shveıtsarııa, Frantsııa, Germanııa jáne Túrkııa elshilikteri óz elderi atynan bir-bir djaz toptaryn usynǵan.
Alǵashqy kontsert búgin keshki saǵat 19:00-de Jambyl atyndaǵy fılarmonııada ótedi.
