Djastın Bıber jazasynan qutylý úshin balalar úıine 50 myń AQSh dollaryn aýdardy
ASTANA. QazAqparat - Kanadalyq ánshi Djastın Bıberdi qańtar aıynda Amerıkanyń Maıamı-Bıch qalasyna polıtseılerdiń qolyna túsken edi. Onda ol mas kúıinde kólik júrgizgenimen qoımaı, tártip saqshylaryna qarsylyq tanytqan. Endi ol óz kinásin moıyndap, jazadan qutylyp otyr, dep habarlady jergilikti BAQ.
Onyń qorǵaýshysy Mark Shapıronyń aıtýynsha, Florıda shtatynda ótken sot sheshimi boıynsha ánshi kinásin moıyndap, jazadan qutylǵan. Biraq ol úshin Bıber kez kelgen qaıyrymdylyq qoryna 50 myń AQSh dollaryn aýdaryp, 500 dollar aıyppulyn tóleýi kerek. Sonymen qatar, psıhologtyń 12 saǵattyq kýrsynan ótýi qajet. Onda oǵan qoǵamda ózin qalaı ustaý kerektigin úıretip, ashýshań minezi kópke zııan ekeni aıtylady. Qorǵaýshynyń aıtýynsha, ánshi balalar qoryna 50 myń dollardy aýdaryp jibergen. Sotta isti qaraǵan sýdıa Ýılm Altfıld sot otyrysynda bul Bıberge bolashaqta sabaq bolýy kerek ekenin aıtyp, qatań eskertken. «Oǵan elikteıtin jastar bar. Sondyqtan, ol ózi úshin ǵana emes, qoǵam aldyndaǵy jaýapkershligi úshin de minezin túzeýi kerek», degen sýdıa. Esterińizge sala keteıik, osy oqıǵa úshin AQSh Prezıdenti ákimshiliginiń saıtynda kanadalyq ánshi Djastın Bıberdi elden shyǵaryp jiberýdi talap etken ujymdyq hat jarııalanǵan bolatyn. Ol hatta Bıber qoǵamdyq tártipti buzyp qana qoımaı, jastardy jaman jolǵa bastap bara jatqany aıtylǵan.
