Djannı Infantıno FIFA prezıdenti bolyp qaıta saılandy

NUR-SULTAN. QazAqparat - Shveıtsarııalyq Djannı Infantıno Halyqaralyq fýtbol federatsııasynyń (FIFA) prezıdenti bolyp qaıta saılandy, dep habarlaıdy euronews.com saıty.

FIFA kongresiniń delegattary sársenbi kúni Parıjde osyndaı sheshim shyǵardy. Budan buryn olar uıym keńesiniń qaǵaz júzinde daýys berýden bas tartý týraly usynys qoldap, Infantınony akklamatsııa - qol soǵyp, shapalaqtaý arqyly saılady.

Infantıno barlyǵyna alǵys aıtyp, FIFA-da jumys isteýdiń úlken qurmet ekenin atap ótti.

49 jastaǵy Infantıno FIFA prezıdenttigine jalǵyz úmitker boldy. Ol bul uıymdy 2016 jyldan beri basqarady. Buǵan deıin FIFA-ǵa iri jemqorlyq daýy saldarynan jumystan shyǵarylǵan Iozef Blatter basshylyq etken bolatyn.