Djakartada eki Koreıa sportshylary tutas bir komanda bolyp jarysqa qatysady
ASTANA. QazAqparat - Soltústik Koreıa men Ońtústik Koreıa sportshylary 18 tamyz ben 2 qyrkúıek aralyǵynda Djakartada ótetin Jazǵy Azııa oıyndarynda tutas bir komanda bolyp jarysqa qatysady, dep habarlaıdy QazAqparat tilshisi.
QR UOK-niń baspasóz qyzmeti málim etkendeı, Soltústik Koreıanyń 34 adamnan quralǵan (sportshylar men bapkerler) toby birikken oqý-jattyǵý ótkizý úshin arnaıy Ońtústik Koreıaǵa kelgen.
«Delegatsııa quramyna 18 kanoeshi, segiz eskek esýshi, tórt basketbolshy qyz jáne olardy ertip júretin tórt adam engen. Olar Phenıannan Beıjiń arqyly Inchhon halyqaralyq áýejaıyna kelip, Seýlden ońtústikke qaraı 150 shaqyrymda ornalasqan Chhondjýǵa ketti. Eki apta boıy olar Chhondjoýda ońtústikkoreıalyq sportshylarmen birlesken oqý-jattyǵý jıyndaryn ótkizbek», - delingen atalǵan habarlamada.
Esterińizge sala keteıik, aqpan aıynda ótken Olımpıada oıyndarynda eki eldiń hokkeıden áıelder komandasy bir tý astynda shyqqan bolatyn. Osy tájirıbeden soń Seýl men Phenıan 18 tamyz ben 2 qyrkúıek aralyǵynda Djakarta men Palembang qalalarynda ótetin Azııa oıyndaryna tutas bir komanda bolyp barýǵa uıǵarypty.
Alǵash ret Soltústik Koreıa men Ońtústik Koreıa sportshylary 1991 jyly Jenevada ótken ústel tennısinen álem chempıonatynda bir komanda esebinde qatysyp, bir altyn, bir kúmis jáne eki qola medal jeńip alǵan bolatyn.
