Djakarta - musylman sán áleminiń astanasy
ASTANA. 27 qazan. QazAqparat - Musylmandar eń kóp shoǵyrlanǵan Indonezııa aldaǵy ýaqytta sharıǵat talaptaryna saı keletin kıim-keshekke degen úlken suranysty qanaǵattandyrýy qajet.
Dástúrge aınalǵan «Djakartadaǵy sán aptalyǵy» dep atalatyn saltanatty sharada jurttyń nazaryna usynylǵan kórer kózge kórikti, denege qonymdy san alýan kıim úlgilerine qarap, bul eldiń musylman sán úlgisiniń ortalyǵyna aınalýdy kózdegen asqaq muratyn tanyǵandaı bolasyń. Búgingi tańda sán ındýstrııasynyń naryqtaǵy aınalymy álem boıynsha 100 mlrd. dollarǵa jetkenin aıta ketýimiz kerek.
Indonezııa bıligi kirisi mol osy salany damytý úshin jas dızaınerlerge jan-jaqty qoldaý kórsetip, 3 mln.-nan asa jumys ornyn ashty. Atalmysh saladan ındonezııalyqtar jylyna 15 mlrd. dollardaı tabys taýyp otyr.
«Biz syry men symbaty mol osy sán salasynyń qulaǵyn ustaıtyn zańdy murageri bolýymyz kerek,- deıdi Indonezııanyń týrızm jáne kreatıvtik ekonomıka mınıstri Marı Pangestý, - Osy baǵytta naqty atqaratyn óz mindetimiz bar. Menińshe, Indonezııa kóp uzamaı musylman sán úlgisiniń ortalyǵyna aınalady».
Qalaı kıiný kerektigine qatysty musylman áıelderine qoıylatyn talapty tym qatal dep qabyldaıtyndardyń qatary kóp. Ásirese, olarǵa musylman áıelderdiń sharıǵat shálisin jamylyp, keń-mol pishilgen kıimder kıetini unamaıdy. Dese de, bul talap ár jerde ár túrli ekenin aıta ketýimiz kerek. Saýd Arabııasy men Aýǵanstan sekildi elderde musylman áıelderdiń kıiný ádebi sharıǵat talaptaryna saı qatań saqtalatyn bolsa, Malaızııa men Indonezııada sharıǵat talaptarynan aýytqymaıtyndaı meılinshe erkindik berilgen.
Qalaı desek te, áıel adam basyna jaýlyq tartyp júrgeni jón. Buǵan qosa, kıgen kıimi tar nemese tym juqa bolmaýy tıis. Osy aptalyq barysynda jas dızaınerler «ógizdi de óltirmeı, arbany da syndyrmaı», sharıǵat talaptary eskerilgen óz ónerlerin pash etý arqyly qatyp qalǵan qasań kózqarasqa toıtarys bere bildi, dep jazady muslim.kz.
