Dj.Býkıkkıo: Qazaqstandaǵy konstıtýtsıonaldyq ózgerister damýǵa úlken septigin tıgizdi

NUR-SULTAN. QazAqparat – Qazaqstandaǵy júzege asqan konstıtýtsıonaldyq ózgerister eldiń damýyna úlken septigin tıgizdi. Bul pikirdi Eýropa Keńesi Venetsıan komıssııasynyń prezıdenti Djannı Býkıkkıo halyqaralyq konferentsııada aıtty, dep habarlaıdy QazAqparat tilshisi.

«1990 jylǵy 24 sáýirde Qazaq SSR Prezıdenti laýazymyn belgileý týraly Zańy qabyldandy. Bul óz kezeginde ulttyq mekemelerdi qurýda mańyzdy qadam boldy», - dedi D. Býkıkkıo Qazaqstanda prezıdenttik ınstıtýttyń engizilgenine 30 jyl tolýyna oraı onlaın rejımdegi halyqaralyq ǵylymı-tájirıbelik konferentsııada.

«Venetsıan komıssııasynda biz tıisti taldaý júrgizdik. Biraz jyldan beri Venetsıan komıssııasy kóptegen elderge qoldaý kórsetýde, onyń ishinde Qazaqstan da bar. Bul turǵyda konstıtýtsıonaldyq reformalar júrgizýde tıisti qoldaýlar jasaldy. Konstıtýtsııa bastapqydan durys jazylyp, teńgerimdi bolǵanymen, kóp jaǵdaıda sol Konstıtýtsııanyń erejeleri qalaı oryndalyp jatqany ózekti bolady», - dep toqtaldy atalǵan komıssııasynyń prezıdenti.

Djannı Býkıkkıo tájirıbelik qadamdarǵa toqtala kele, Konstıtýtsııaǵa túzetýler engizýde qajettilikter bolatynyn atap ótti.

«Nelikten demokratııalyq elder konstıtýtsıonaldyq reformalardy júrgizedi? Bul qadamdar atqarýshy, zańnamalyq ári sot sekildi bılik tarmaqtary arasynda teńgerimge qol jetkizý úshin, sondaı-aq aldaǵy syn-qaterdi eńserýge ári azamattardyń zańdy talabyn qanaǵattandyrý úshin iske asyrylady... 2017 jylda Qazaqstanda konstıtýtsıonaldyq reformalardy júrgizý kezindegi negizgi maqsat – ol bılikti bólýdiń qoldanystaǵy júıesin jaqsartý. Venetsıan komıssııasy osyndaı konstıtýtsıonaldyq ózgeris alǵa ilgerileýdegi úlken qadam bolady dep sanaıdy», - dedi Djannı Býkıkkıo.