Dıýtı-frıde turyp jatyrmyz — Dýbaı áýejaıynda qalyp qoıǵan týrıster

ASTANA. KAZINFORM — Parsy shyǵanaǵy elderinde nóser jańbyr jaýyp, ol sý tasqyny men kólikterdiń toqtap qalýyna sebep boldy. Tabıǵı apat saldarynan 20 adam qaıtys boldy, olardyń kóbi Omanda. Dýbaı áýejaıy sý astynda qaldy, dep habarlady VVS. 

Birikken Arab Ámirlikterinde jolaýshy tasymaly jaǵynan álemde birinshi orynda turǵan Dýbaı halyqaralyq áýejaıynyń jumysy toqtap qaldy.

Áýejaıdyń perrondary, taksı jáne ushý-qoný jolaqtary sý astynda qalyp, júzdegen reıs toqtatyldy.

«BAÁ-degi buryn-sońdy bolmaǵan aýa raıyna baılanysty Dýbaı halyqaralyq áýejaıyndaǵy reıster keshiktirildi. Dýbaı áýejaılary jolaýshylarǵa reısiniń ushatyny týraly avıakompanııadan rastaý almasa, 1-termınalǵa barmaýǵa keńes beredi» dep habarlady áýejaıdy basqarý kompanııasy.

Sársenbide Dýbaı áýejaıyna jáne odan shyǵatyn 270-ten astam reıs toqtatyldy, taǵy 370 reıs keıinge qaldyryldy, dep habarlaıdy FlightAware.

Negizgi baılanystyrýshy hab sanalatyn jáne barlyq kontınentter reısterine qyzmet kórsetetin áýejaı basshylyǵy áýejaı jumysyn qalpyna keltirý ýaqytty qajet etetinin eskertti.

shtab-páteri Dýbaıda ornalasqan Emirates áýe kompanııasy beısenbige deıin reısterine tirkelýdi toqtatty, sonyń saldarynan termınaldary jolaýshylarǵa lyq toldy.

«Biz dıýtı-frıde turyp jatyrmyz» deıdi tirkelý aımaǵynda qalyp qoıǵan týrıster.

Buǵan deıin Air Astana áýe kompanııasynyń Dýbaıǵa reısterin toqtatyp jatqany habarlanǵan bolatyn.

Sondaı-aq qazaqstandyq tasymaldaýshy áýe kompanııanyń 289 jolaýshysy sý basý saldarynan jabylyp qalǵan reısterdi kútip otyrǵanyn habarlady.