Dıýsseldorfte úsh jasóspirim teraktige daıyndaldy degen aıyppen túrmege qamaldy

ASTANA. KAZINFORM — Germanııada Dıýsseldorftyń (Soltústik Reın-Vestfalııa jeri) okrýgtik soty eki qyzdy (16 jáne 17 jasta) jáne bir jigitti (16 jasta) úsh jylǵa bas bostandyǵynan aıyrdy, dep habarlaıdy Bild.

Habarlanǵandaı, olardyń yqtımal nysanalary birneshe ǵıbadathana men polıtsııa bólimsheleri bolǵan. Sotta kámeletke tolmaǵandardyń radıkaldanyp, áleýmettik jelilerde IGIL (Qazaqstanda tyıym salynǵan uıym – red.) úgit-nasıhatynyń yqpalyna túskeni aıtyldy.

Shabýyl jasaý úshin olar bastapqyda Gambýrg, Dortmýnd, Dıýsseldorf, Keln, Izerlon jáne Shtýtgart qalalaryndaǵy polıtsııa bólimshelerin, vokzaldardy jáne sot zaldaryn tańdaǵan.

– Aqyrynda, olar adam kóp jınalatyn ýaqytta polıtsııa bólimsheleri men dinı oryndarǵa (shirkeýler, sınagogalar) kirip, olardy janarmaı toltyrylǵan bótelkelermen órtep, atys jáne sýyq qarý qoldanyp, múmkindiginshe kóp adam óltirýdi josparlaǵan, – dep málimdedi sot ókili Vera Drees.

Top músheleriniń biri ınternetten bomba jasaý nusqaýlyǵyn taýyp alyp, ony sybaılastaryna kórsetken. Alaıda osy kezde polıtsııa qyzmetkerleri kúdiktilerdi anyqtap, olardy ótken jyldyń naýryz aıynan beri qamaýda ustaǵan. Sottalǵandardyń advokaty úkimge shaǵymdanatynyn málimdedi.

Eske sala keteıik, 15 naýryzda Irak premer-mınıstri AQSh basqaratyn koalıtsııa kúshterimen birlesken operatsııa nátıjesinde Irak pen Sırııadaǵy «Islam memleketi» (Qazaqstanda tyıym salynǵan uıym - red.) jetekshisi joıylǵanyn habarlaǵan bolatyn.