Dıý Soleı tsırki shoýynyń komandasy óz daıyndyqtary jaıynda aıtyp berdi
ASTANA. QazAqparat - Dıý Soleı (Cirque du Soleil) tsırkiniń 45 DEGREES komandasy Astanadaǵy EKSPO-2017 kórmesine arnaıy ázirlengen REFLEKT eksklıýzıvtik shoýyn daıyndady. Shoýdy daıyndaý úderisi jaıynda onyń avtorlary «QazAqparatqa» bergen eksklıýzıvtik suhbatynda aıtty.
Shoý rejısseri Fernand Raınvıldiń (Fernand Rainville) aıtýynsha, shoý tujyrymdamasy ótken shaq pen qazirgi sát bolashaqty jasaıdy degen ıdeıaǵa negizdelgen.
«Shoý, ásirese, bolashaq energııasy konteksinde adam energııasyn negizge alǵan. Basty keıipker - ýaqyt aralyǵynda saıahattaıtyn arheolog Arman. Onyń saıahattaý joly arqyly kórermender umyt bolǵan ótken shaqtyń búgingi tehnologııalyq dáýirmen betpe-bet kelgen tusyn tamashalaı alady», - dedi ol.
Rejısser shoýdy ázirlemes buryn qazaq mádenıeti jaıly shala bilgenin atap ótti. Shoýdy qalyptastyrýdyń belsendi fazasyna kirisý úshin Fernand Raınvıl 2016 jylǵy tamyz, qyrkúıekti Qazaqstan tarıhy men mádenıetin zerdeleýge arnady. «Saqtardyń tarıhy, attardy úıretýi, sol ýaqyttaǵy olardyń yqpaly meni erekshe tańǵaldyrdy», - dep atap ótti ol.
Jobanyń dırektory Bernard Pýaremen birge ol eki ret Qazaqstanǵa bardy. Fernand ulttyq kıimder men jádigerlerdi kórý úshin Qazaqstannyń murajaılaryn aralady. Ol Kanadaǵa kóptegen sýretter men anyqtamalar ákelip, osy ıdeıalaryn iske asyrý úshin dızaınerlerge júgindi. «Men úshin jobada kórmeniń «Ómir energııasy» - Kún, qazaqtardyń rýhyn ashý mańyzdy boldy. Maǵan Samuryq qusy týraly ańyz, qazaqstandyq tý elementteri qatty unady. Osynyń barlyǵyn dızaınerler men sýretshiler obraz, dekoratsııalar arqyly alyp shyǵýy tıis boldy», - dedi ol.
Astana sáýleti - fýtýrıstik. Munda aınalar kóp, ádemi jaryqtandyrylǵan. Osy sáýlet shoý «Reflekt» (kórinis) taqyrybyna arqaý boldy. «Reflekt» ıdeıasy aınaǵa qarap óz beıneńdi kórý degendi bildiredi. Bul syrt kelbettiń kórinisi ǵana emes, ıaǵnı, siz ishki álemińnen shyqqan energııany kóre alasyz», - dep túsindirdi rejısser.
Onyń aıtýynsha, shoýdy jasaýshylar ony derekti fılmge aınaldyrǵysy kelmedi. «Munda oqıǵa tarıh aıasynda shektelmeıdi, biz tek Qazaqstan tarıhyna toqtalyp ótýdi ǵana maqsat tuttyq. Kostıýmder ár túrli. Biraq olar qazaqtardyń tarıhy men mádenıetiniń áserimen ázirlendi. Kostıýmder boıynsha sýretshi Djeıms Lavýa (James Lavoie) ekeýmiz de shoýǵa «Altyn Adamdy» kiristirgimiz keldi. Biz ony kóshpeli ulttyń rýhyn sezindirý úshin erekshe etip jasaýǵa tyrystyq», - dedi Fernand Raınvıl.
Jobanyń dırektory Bernard Pýareniń aıtýynsha, tutastaı, qazaqstandyq shoý úshin arnaıy daıyndalǵan kostıýmder 300 erekshelikten turady.
«Barlyq kostıýmder, tehnıkalyq jabdyqtar men dekoratsııalar Qazaqstanǵa 25 konteınermen jetkizildi. Bir bóligi Qazaqstanǵa kememen, taǵy bir bóligi - júk kólikterimen ákelindi», - dedi ol.
Mundaı aýqymdy shoýdy ázirleý kóp ýaqytty qajet etedi. Mysaly, buǵan mýzykany kompozıtor Saımon Karpente (Simon Carpentier) osy jylǵy qańtardan bastap jazdy. «Bul taza qazaq áýeni emes, alaıda kompozıtsııaǵa zamanaýı dybystarmen, aranjırovkamen qosa, dombyra úni de qosylǵan. Mýzyka óte áserli shyqty», - dedi rejısser.
Tutastaı, shoýǵa 120 adam jumyldyrylǵan. Premeradan keıin Qazaqstanda 80-ge jýyq adam qalyp, qalǵany Kanadaǵa ketedi. Qazaqstanda premeradan keıin tsırktiń 38 ártisi, óndiristik jáne tehnıkalyq personaldan 40-qa jýyq adam qalady.
