«Dynamo Moscow» jáne «Astana Arlans» - 5:0
ASTANA. 11 aqpan. QazAqparat - Máskeýde ótken «Dynamo Moscow» jáne «Astana Arlans» arasyndaǵy kezdesý 5:0 esebimen Máskeýlik komandanyń jeńisimen aıaqtaldy. Bul týraly «Alaman» ulttyq sport portaly habarlady.
Bıyl «A» tobynda óte myqty komandalar jınalǵan sııaqty. Sonyń ishinde Reseı bıyl óz quramyn barynsha kúsheıtip alypty. Byltyrǵy álsiz «Kreml aıýlary» bıyl joq. Onyń ornyna asa myqty «Dynamo Moscow» komandasy paıda bolǵan. Italııanyń da álemniń myqty boksshylaryn jınap alǵanyn kórdik. Ásirese ýkraına legıonerlerin atap aıtýǵa bolady. Al ózimizge kelsek, legıonerlerimizdiń byltyrǵyǵa qaraǵanda sapasy jaqsarǵanymen, negizinen óz boksshylarymyz jarap tur.
Sonymen osy kezdesýden keıin «A» tobynda Reseı 22 upaımen birinshi orynǵa shyqsa, ekinshi orynda 19 upaımen Italııa tur. Úshinshi oryn 19 upaı jınaǵan Qazaqstannyń enshisinde.
Osy joly Reseıdi jeńgende birinshi orynǵa shyǵýǵa múmkindik bar bolatyn. Endi ekinshi orynnyń aýyly da alystaı túsken sııaqty. Olaı deýimizdiń sebebi Mılannyń búgingi qarsylasy Bangkok komandasy. Onyń ústine kezdesýdiń Mılanda ótetinin eskersek, ıtalııandyqtardyń kósh sońynda kele jatqan komandaǵa ese jibermesi anyq.
Sondaı-aq «A» tobynda tórtinshi bolyp 14 upaımen Úndistannyń «Mumbai Fighters» komandasy kele jatsa, 10 upaı jınaǵan «Los Angeles Matadors» besinshi, 1 upaıy bar «Bangkok Elephants» altynshy orynda.
Bizdiń kelesi qarsylasymyz Úndistannyń «Mumbai Fighters» komandasy. Kezdesý 17 aqpanda ótedi. Dál sol kúni Máskeýlikter óz alańynda Mılandy qabyldaıdy.
Al «V» tobyna kelsek bizdiń byltyrǵy basty qarsylasymyz bolǵan Ázirbaıjannyń «Baku Fires» komandasy kósh bastap tur. Barlyq kezdesýlerin jeńispen aıaqtaǵan olardyń qorjynynda 24 upaı bar. Ekinshi orynda 13 upaımen Germanııanyń «Leipzig Leopards» komandasy kele jatsa, taǵy bir 13 upaı jınaǵan Meksıkanyń «Mexico City Guerreros» komandasy úshinshi orynǵa jaıǵasypty. Al byltyrǵy chempıon Frantsııanyń «Paris United» komandasynyń jaǵdaıy bıyl máz emes. Bar bolǵany 12 upaı jınaǵan frantsýzdar óz tobynda tórtinshi orynda keledi. Besinshi orynda 11 upaımen Túrkııanyń «Istanbul Bosphorus» komandasy tursa, Qytaıdyń «Beijing Dragons» komandasy 3 upaımen altynshy orynda eken.
Pleı-off kezeńine ár toptan 4 komanda ótetin bolady.
