Dychko men Eleýsinovtiń menedjeri boksshylardyń josparlaryn aıtty
NUR-SULTAN. QazAqparat - Qazaqstandyq kásipqoı boksshylar - Ivan Dychko men Danııar Eleýsinovtiń menedjeri Zııa Álıev Sports.kz portalyna bergen suhbatynda olardyń bıylǵa qurǵan josparlary týraly aıtyp berdi, dep habarlaıdy QazAqparat.
«12 shildedegi jekpe-jekten keıin Ivan tamyzda taǵy bir kezdesý ótkizedi. Biz ony qaıta babyna keltirýge áreket etip jatyrmyz. Ivan bıyldyń sońyna deıin úsh jekpe-jek ótkizetini anyq. Osy jyldy Ivan 11-0 nemese 12-0 rekordymen aıaqtaıdy dep otyrmyz. Kásipqoı boksta, ásirese Amerıkada nokaýttardyń mańyzy zor. Ol gonorarǵa da, aıqastyń qyzyq bolýyna da, televıdenıege de áser etedi. Ivan aldaǵy kezdesýleriniń barlyǵyn nokaýtpen aıaqtasa eken dep tilep otyrmyz», - deıdi Álıev.
Onyń sózine qaraǵanda, Ivandy Derık Santos-Rosarıo men Rık Mandres baptap otyrǵan kórinedi.
Danııar Eleýsinov týraly aıtqan Z.Álıev, onyń kásipqoı boksqa áli tolyq beıimdelmegenin atap ótti.
«Ol áli beıimdelgen joq. Jekpe-jekti júrgizý, tehnıkaǵa qatysty keı tustarda, ıaǵnı naǵyz boksqa qatysty kemshilikteri bar. Danııar keıde kásipqoıda júrgendeı sezinedi. Kelesi jekpe-jegin 27 shilde kúni Dallasta óńirlik beldikterdiń biri úshin ótkizedi. Ol alǵa qadam basatyn kez jaqyndap keledi», - deıdi ol.
«Onyń stılin ózgerteıin dep otyrǵan eshkim joq. Tek kásipqoı boksta soqqyǵa kúsh salyp, qarsylasty muqatýǵa tyrysý qajet. Mindetti túrde nokaýtqa jiberý qajet dep otyrǵan joqpyn, qarsylasqa barynsha aýyr soqqy jasap, jekpe-jekti qyzyqty ótkizý kerektigin aıtyp otyrmyn. Negizinde, bul onyń qolynan keledi», - deıdi menedjer.
