Dúısenova óńirlerdegi densaýlyq saqtaý nysandary qurylysyndaǵy problemalardy atady

ASTANA. QazAqparat - Birqatar óńirdegi densaýlyq saqtaý nysandarynyń qurylysy jyl sońyna deıin aıaqtalmaýy múmkin. Bul týraly búgin QR Úkimeti otyrysynda elimizdiń Densaýlyq saqtaý jáne áleýmettik damý mınıstri Tamara Dúısenova málim etti.

Mınıstr óńirlerdiń belsendi jumystar atqarýyna qaramastan biraz problema bar ekendigin, olardyń densaýlyq saqtaý nysandary qurylysynyń der ýaqytynda aıaqtalýyna kedergi keltirýi múmkindigin atap ótti.

«Birinshi kezekte bul daıyndyǵy 95-100 paıyzdy quraıtyn, aıaqtalý kezeńinde turǵan Qaraǵandy oblysyndaǵy 11 dárigerlik ambýlatorııaǵa qatysty. Problema merdigerlerdiń nysandy tapsyrý merzimin buzýynda bolyp otyr. Osyǵan baılanysty qazir oblysta aıyppul sanktsııalaryn salý, odan keıin baryp oryndalǵan jumystarǵa tólem jasaý boıynsha  sot  talqylaýy júrgizilýde. Nysandar daıyndyǵynyń óte joǵary deńgeıin eskere otyryp, ákimdik sot talqylaýyn aıaqtap, osy jyldyń sońyna deıin atalǵan nysandardy paıdalanýǵa berý sharalaryn qabyldaýy qajet», - dedi mınıstr.

Onyń atap ótýinshe, daıyndyq deńgeıi 70-95 paıyzdy quraıtyn kelesi 4 densaýlyq saqtaý nysany bar. Olarǵa qajet qural-jabdyqtardy tikeleı jetkizýshi áli ákelmeı otyr. Bul Qabanbaı batyr aýylyndaǵy dárigerlik ambýlatorııaǵa, Aqmola oblysyna qarasty Zerendi aýylyndaǵy emhanaǵa, Qaraǵandydaǵy balalar aýrýhanasyna jáne Qyzylorda oblysyna qarasty Talsýat aýylyndaǵy psıhonevrologııalyq ınternat úıge qatysty jaıttar.

«Baqytjan Ábdiruly, bul óńirlerde ǵımarattar daıyn, tek tehnologııalyq qural-jabdyqtar ǵana qaldy.  Men sizden oblys ákimderine tehnologııalyq qural-jabdyqtardy jetkizý máselesin merdigerlermen sheshýdi tapsyrýyńyzdy ótinemin»,-  dedi T.Dúısenova.

Sonymen qatar mınıstr qurylys jumystary 70 paıyzǵa da oryndalmaǵan 6 nysannyń bar ekendigin atap ótti.